CCM ITAENDELEA KUHUBIRI AMANI, UMOJA NA MSHIKAMANO-RAIS MWINYI

Imewekwa na Dismas Lyassa

Makamu Mwenyekiti wa CCM Zanzibar Dk.Hussein Ali Mwinyi amesema Chama cha Mapinduzi kitaendelea na msingi yake ya kudumu ya kujenga Amani, Umoja na Mshikamano na kuwahimiza wana CCM kuwa wastahamili  wakati huu kuelekea Uchaguzi Ujao.

Dk.Mwinyi ameyasema hayo juzi tarehe 12 Agosti 2024 ikiwa ni mwendelezo wa ziara yake ya kuzungumza na Wajumbe wa Kamati za Siasa za Wadi, Tawi, Jimbo, Wilaya na Mkoa za Mkoa wa Kusini kichama katika ukumbi wa Dkt.Ali Mohamed Shein, Tunguu.

Aidha Dk.Mwinyi amewanasihi Viongozi wa Vyama vya Siasa kuacha kuhubiri Siasa za chuki  na badala yake  kuhubiri Amani kwa dhamira ya kuimarisha Amani ya nchi.

Halikadhalika Dk.Mwinyi amesema  Chama cha Mapinduzi kimefanikiwa kwa asilimia mia moja  katika utekelezaji wa Ilani na kuwahimiza wananchi kuunga mkono  hatua hiyo.

Pia ameeleza kuwa Serikali bado ina mpango wa kujenga barabara ya kisasa kuanzia Tunguu hadi Makunduchi yenye urefu wa takriban kilomita 43. Barabara hiyo itakuwa ya njia nne na yote itafungwa taa.

Kwa upande mwingine Dk.Mwinyi  amewasisitiza wana CCM kujiandikisha katika Daftari la kudumu la Wapiga kura ili kuwa na sifa ya kushiriki Uchaguzi mkuu mwakani  na kukihakikishia Chama cha Mapinduzi Ushindi.