Saturday, February 23, 2019

MAKAMU WA RAIS AZIAGIZA HALMASHAURI ZOTE NCHINI KUTOA ASILIMIA 10 YA MAPATO YAKE KWA WANAWAKE, VIJANA NA WALEMAVU

Makamu wa Rais wa Jamhuri ya Muungano wa Tanzania Mhe. Samia Suluhu Hassan amezitaka Halmashauri zote nchini kuhakikisha zinatoa asilimia 10% ya mapato yake kwa Wanawake, Vijana na Walemavu kwa mujibu wa sheria.


Makamu wa Rais ameyasema hayo leo wakati akihutubia wananchi katika Viwanja vya TASAF wilaya ya Sikonge mkoani Tabora ikiwa ni siku ya tatu ya ziara yake ya kukagua na kuhamasisha shughuli za maendeleo.

“Niagize Halmashauri zote kuhakikisha zinatoa fedha hizo kama ilivyopangwa bila riba yeyote kwani fedha hizi zipo kisheria na kwa kutozitoa ni kuvunja sheria”alisema Makamu wa Rais.

Aidha, amesisitiza Halmashauri kuweka utaratibu mzuri kuhakikisha fedha zinazokopeswa kwa vikundi zinarejeshwa kwa kuwa lengo la fedha hizo ni kuwanufaishwa walengwa zaidi huku akishauri kuwepo na makundi yenye mradi unaoleta tija kwa manufaa ya wengi.

Makamu wa Rais ametoa wito kwa wakulima wa tumbaku mkoani Tabora kutoharibu mazingira kwa kukata miti kwani hasara ya kukata mti ni kubwa kulikoni faida wanayoipata hivyo amewashauri kutumia teknolojia mpya ya Solar na Umeme kama ilivyoshauriwa na wataalamu.

Wakati huohuo Mbunge wa Jimbo la Sikonge ambaye pia ni Waziri wa Viwanda, Biashara na Uwekezaji Mhe. Joseph Kakunda amesema mpaka 2021 kwa mara ya kwanza vijiji vyote wilayani Sikonge vitapata umeme wa uhakika.

Mheshimiwa Kakunda ameleeza namna wananchi wa Jimbo lake walivyoridhishwa na kasi ya maendeleo ambapo Serikali imetoa pesa katika miradi ya afya, miradi ya elimu na kuboresha miundombinu ya barabara.

Pia alielezea Vipaumbele ambavyo wamejiwekea jimboni kwake katika kukuza fursa za kimaendeleo, vipaumbele hivyo ni kuanzisha viwanda vya usindikaji mazao ya kilimo, pili viwanda vya vifaa vya majumbani na ujenzi na tatu ni viwanda vitakavyoajiri watu wengi kwa wakati mmoja.

Kwa upande mwingine Waziri wa Madini Mhe. Doto Biteko amesema Serikali ya awamu ya tano imedhamiria kurudisha uchumi wa madini kwa Watanzania.

“Wananchi changamkieni kuwekeza kwenye uchumi wa madini, lipeni kodi kwa maendeleo ya Taifa letu”.  alisema Waziri huyo.

Katika ziara hiyo Makamu wa Rais aliweka jiwe la msingi la ujenzi wa jengo la Halmashauri ya wilaya hiyo,alikabidhi hundi ya shilingi milioni 40 kwa vikundi 11 vya ujasiriamali  na kuzungumza na wananchi.

Makamu wa Rais ameongozana na Waziri wa Nchi Ofisi ya Makamu wa Rais Muungano na Mazingira Mhe. January Makamba, Waziri wa Madini Mhe. Doto Biteko, Naibu Waziri Maji Mhe. Juma Aweso, Naibu Waziri Ujenzi Mhe. Elias Kwandikwa, Naibu Waziri wa Ardhi, Nyumba na Maendeleo ya Makazi Mhe. Angelline Mabula na Naibu Waziri TAMISEMI Mhe. Mwita Waitara
Share:

MADAKTARI BINGWA KUTOKA CHINA WATUA MOI

 Mkurugenzi Mtendaji wa MOI Dkt Respicious Boniface akizungumza kuhusu hali ya utaoji huduma wa Taasisi ya MOI katika hafla ya kupokea jopo la madaktari Bingwa kutoka Hospitali ya Chuo Kikuu cha Peking cha China
 Mkurugenzi Mtendaji wa Hospitali ya Taifa ya Muhimbili Prof. Lawrence Mseru akichangia mada katika hafla ya kupokea mdaktari bingwa kutoka kutoka Hospitali ya Chuo Kikuu cha Peking cha China
 Profesa Yuanli Zhao kutoka Hospitali ya Chuo Kikuu cha Peking cha China akiwasilisha mada kuhusu Hospitali hiyo inavyotoa huduma za Kibingwa za hali ya juu kwa kutumia teknolojia ya kisasa
 Daktari bingwa wa upasuaji wa Ubongo, Mgongo na Mishipa ya fahamu MOI Dkt. Nicephorus Rutabansibwa akitoa taarifa ya hali ya huduma za matibabu na upasuaji wa Ubongo, Mgongo na Mishipa ya fahamu katika Taasisi ya MOI
 Sehemu ya wajumbe wa Menejimenti wa Taasisi ya MOI na MNH wakifuatilia jambo katika hafla ya kuwapokea madaktari bingwa kutoka Hospitali ya Chuo Kikuu cha Peking cha China
 Mkuu wa Kitengo cha dharura cha Hospitali ya Taifa Muhimbili Dkt Juma Mfinanga akiwasilisha mada katika hafla ya kupokea madaktari bingwa kutoka Hospitali ya Chuo Kikuu cha Peking cha China
Bwana Nathan Chimoto akitoa taarifa ya hali ya utoaji huduma katika kitengo cha uangalizi maalum cha MOI katika hafla ya kupokea madaktari bingwa kutoka Hospitali ya Chuo Kikuu cha Peking cha China. (PICHA ZOTE NA KHAMISI MUSSA)


NA KHAMISI MUSSA
Dar es Salaam, 23/02/2019. Madaktari Bingwa watatu wa upasuaji wa Ubongo, Mgongo na Mishipa ya Fahamu (Neurosurgeon) kutoka hospitali ya kimataifa ya Chuo Kikuu cha Peking cha nchini China wamepokelewa MOI ambapo wataendesha mafunzo ya nadharia siku ya leo na kuendesha kambi ya upasuaji siku ya jumatatu tarehe 25/02/2019.

Mwenyekiti wa Bodi ya Wadhamini ya MOI Profesa Charles Mkonyi amesema ujio wa madaktari bingwa hawa umewezekana kufuatia maagizo yaliyotolewa na Rais wa Jamhuri ya Muungano wa Tanzania Mh. Dkt. John Pombe Magufuli ya kuhakikisha Hospitali ya MOI na Chuo kikuu MUHAS zinaingia mkataba wa ushirikinao na Hospitali ya Peking jambo ambalo limetekelezwa chini ya Wizara ya Afya ,Maendeleo ya Jamii, Jinsia ,Wazee na Watoto inayoongozwa na Mh. Ummy Mwalimu.

Katika utekelezaji huo, Taasisi ya MOI na Peking ziliingia mkataba wa ushirikiano katika maeneo ya tiba, utafiti na mafunzo. Mkataba huo ulisainiwa na Mkurugenzi Mtendaji wa MOI Dkt. Respicious Boniface pamoja na Rais wa Peking Profesa. Hongxia Yu ambapo MOI inanufaika katika kuboresha huduma za kibingwa za daraja la juu (Super specialised services) katika maeneo ya upasuaji wa Mifupa, Ubongo, Mgongo na Mishipa ya Fahamu.

Aidha, Mkurugenzi Mtendaji wa MOI Dkt. Respicious Boniface amesema ujio wao utasaidia kuwajengea uwezo wataalamu wa ndani kwa kuwapa mbinu mpya za upasuaji na hivyo watanzania kupata huduma bora na za kibingwa za Mifupa, Ubongo,Mgongo na Mishipa ya Fahamu bila kwenda nje ya nchi.

“Tunamshukuru sana Mh Rais Dkt. John Pombe Magufuli kwa kutuletea wataalamu hawa, Hospitali yetu ya MOI itanufaika sana kwani wenzetu hawa wana uzoefu mkubwa katika utoaji wa huduma hususani hizi ambazo tunatoa hapa MOI, binafsi nilifanikiwa kuiona hospitali yao kwakweli ni ya viwango vya kimatifa, sisi pia tunatamani kufikia viwango hivyo” alisema Dkt. Boniface.

Kwa upande wake Mkurugenzi Mtendaji wa Hospitali ya Taifa ya Muhimbili Profesa Lawrence Mseru amesema ushirikiano huu utakuwa wenye manufaa makubwa kwa Watanzania kwani Hospitali ya Peking ni bora kutokana na uzoefu wa wataalamu wake pamoja na miundo mbinu ya kisasa  hivyo kufanya huduma zake kuwa bora.

“Mwaka jana mimi pamoja na Mkurugenzi Mtendaji wa MOI tulipata fursa ya kutembelea hospitali hii ya Peking, kwa kweli ni Hospitali kubwa ,nzuri na yenye huduma bora sana, naamini kupitia ushirikiano huu watashirikiana nasi kuboresha huduma hapa nchini” alisema Prof. Museru.
Share:

MKUCHIKA AWASHAURI MAOFISA UTUMISHI KUINGIZA TAARIFA SAHIHI ZA WATUMISHI KWENYE MFUMO SHIRIKISHI WA TAARIFA ZA KIUTUMISHI NA MISHAHARA (HCMIS)

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Kapt (Mst) George H. Mkuchika amewakumbusha Maafisa Utumishi kuingiza taarifa sahihi za watumishi kwenye Mfumo Shirikishi wa Taarifa za Kiutumishi na Mishahara (HCMIS) ili kutozalisha watumishi hewa na kupunguza kero kwa wastaafu katika kupata haki zao kama inavyostahili.

Mhe. Mkuchika ameyasema hayo wilayani Ruangwa wakati wa kikao kazi na watumishi wa Halmashauri ya Wilaya ya Ruangwa mkoani Lindi, kabla ya kutembelea utekelezaji wa miradi ya TASAF wilayani humo.

Mhe. Mkuchika amefafanua kuwa, endapo maafisa utumishi watashindwa kuingiza taarifa sahihi za watumishi kwenye mfumo wa HCMIS itasababisha kupoteza taarifa na ikitokea mtumishi kufariki au kustaafu itapelekea Ofisi ya Rais Utumishi kukosa taarifa sahihi za mtumishi huyo wanapotaka kuandaa stahili zake.

“Niwakumbushe maafisa utumishi nchini kuhakikisha mnatimiza wajibu wenu kwa kuwahudumia ipasavyo watumishi wa umma walio katika maeneo yenu ya kazi na wananchi kwa kutoa huduma bora kwa wakati na bila upendeleo,” Mhe. Mkuchika amesema.

Aidha, Mhe. Mkuchika ameongeza kuwa, endapo maafisa utumishi watatekeleza wajibu wao ipasavyo, watumishi wastaafu watapata haki yao ya kulipwa mafao kwa wakati kama inavyostahili na kuwahimiza maafisa utumishi kufuatilia mafao ya watumishi wastaafu kwa moyo bila kulazimishwa wala kutaka rushwa.

Mhe. Mkuchika amesema kuwa, ili Serikali iweze kufanikisha zoezi la ulipaji mafao kwa mtumishi mstaafu kwa wakati na kwa usahihi, ni wajibu wa Afisa Utumishi kuhakikisha taarifa zilizopo kwenye Mfumo Shirikishi wa Taarifa za Kiutumishi na Mishahara (HCMIS) ni sahihi.

“Si jambo zuri kwa mtumishi kusafiri kutoka kituo chake cha kazi kwenda Ofisi ya Rais Utumishi, Dodoma kufuata huduma ambayo Afisa Utumishi anaweza kuitatua,” Mhe. Mkuchika amesisitiza.

Mhe. Mkuchika ameweka bayana kuwa, endapo mtumishi atafuata huduma Ofisi ya Rais Utumishi, atamrudisha mtumishi huyo kwenye kituo chake cha kazi ili jambo lake lifanyiwe kazi na Afisa Utumishi husika.

Ameongeza kuwa, Serikali imetoa mafunzo ya matumizi ya mfumo Shirikishi wa Taarifa za Kiutumishi na Mishahara (HCMIS) kwa maafisa utumishi lakini mpaka sasa, Ofisi ya Rais Utumishi imekuwa ikipokea malalamiko ya watumishi wanaosafiri kutoka vituo vyao vya kazi kwenda Dodoma kuangalia taarifa zao.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Kapt (Mst) George H. Mkuchika (Mb) yuko katika ziara ya kikazi mkoani Lindi yenye lengo la kuhimiza uwajibikaji kwa watumishi wa umma pamoja na kukagua utekelezaji wa miradi ya TASAF mkoani humo.
Share:

ZIARA YA MAKAMU WA RAIS MKOANI TABORA

Makamu wa Rais Samia Suluhu Hassan, akiwaongoza viongozi kuweka Jiwe la Msingi Ofisi ya Halmashauri ya Wilaya ya Sikonge leo wakati wa ziara yake mkoani Tabora.
Makamu wa Rais wa Jamhuri ya Muungano wa Tanzania Mhe. Samia Suluhu Hassan akiwahutubia wakazi wa wilaya ya Sikonge leo katika Viwanja vya TASAF.
Baadhi ya wakazi wa Wilaya ya Sikonge wakimsikiliza  Makamu wa Rais wa Jamhuri ya Muungano wa Tanzania Mhe. Samia Suluhu Hassan (hayupo pichani) wakati akiwahutubia leo katika Viwanja vya TASAF.
Mkuu wa Mkoa wa Tabora Aggrey Mwanri akitoa neno la utangulizi kabla ya kumkaribisha  Makamu wa Rais wa Jamhuri ya Muungano wa Tanzania Mhe. Samia Suluhu Hassan(hayupo katika picha) ili awahutubie wakazi wa wilaya ya Sikonge leo katika Viwanja vya TASAF. (Picha na Tiganya Vicent)
Share:

WAZIRI MKUU ATOA SIKU 16 KWA MKURUGENZI ROMBO


Na Mwandishi Maalum, Rombo
 WAZIRI Mkuu Kassim Majaliwa (pichani) ametoa siku 16 kwa Mkurugenzi wa Halmashauri ya Wilaya ya Rombo, Magreth John awe amepeleka kwenye kijiji cha Holili mgawo wa asilimia 20 sawa na sh. milioni 114 zinazotokana na mauzo ya madini ya pozolana.

Kulingana na agizo hilo Mkurugenzi huyo wa wilaya anatakiwa awe amewasilisha fedha hizo kabla ya Machi 10, mwaka huu.

Ametoa maagizo hayo leo Februari 23, 2019,  wakati akizungumza na wananchi na watumishi wa Kituo cha Pamoja cha Forodha cha Holili mpakani mwa Tanzania na Kenya, akiwa katika ziara yake ya kikazi mkoani Kilimanjaro.

Maagizo hayo ameyatoa baada ya wananchi wa kijiji hicho cha Holili kuwasilisha malalamiko yao kupitia mabango wakimuomba awasaidie ili Halmashauri hiyo iweze kulipa fedha zao zinazotokana na mapato ya mauzo ya madini hayo yanayochimbwa kijijini kwao.

 “Mkuu wa wilaya, simamia kuhakikisha kiasi hicho cha fedha kinakwenda kwa wananchi na Mkuu wa Mkoa (Dk. Anna Mgwira) nataka nipate taarifa kuwa fedha hizo zimeshalipwa kwa uongozi wa kijiji husika.” amesema Waziri Mkuu.

Kadhalika, Waziri Mkuu amewataka watendaji katika maeneo mbalimbali nchini kuwa wamepelekwa huko kwa ajili ya kuwahudumia wananchi, hivyo hawana budi kutenga muda wa siku tatu kwa wiki na kwenda maeneo ya vijijini kusikiliza ili kuzupatia ufumbuzi kero zinazowakabili.

Wakati huo huo, Waziri Mkuu amesema hali ulinzi na usalama katika mpaka huo si nzuri, Serikali imeamua kuimarisha ulinzi kwenye mpaka huo, hivyo ni muhimu kwa wananchi washirikiane katika kuulinda mpaka huo.

Waziri Mkuu ameviagiza vyombo vya ulinzi na usalama kuwakamata na kuwachukulia hatua watu wote watakaokamatwa wakipita au kuingiza mizigo kupitia njia zisizo rasmi kwa sababu hao ndio wanaopitisha silaha.

Waziri Mkuu amesema wananchi wa Tanzania na Kenya hawajazuiwa kufanya biashara upande wowote bali wanatakiwa wafuate sheria, kanuni na taratibu zilizopo katika nchi husika ikiwa ni pamoja na kutumia njia rasmi.

Amewataka viongozi na watendaji waliopo maeneo ya mipaka huo wa Holili wawe makini kwa sababu mpaka huo hauko salama na kuna mambo mengi yanayoendelea ambayo yapo kinyume cha sheria.
Share:

Friday, February 22, 2019

RAIS DK. MAGUFULI MSIMBANI NYUMBANI KWA WAZIRI DK. KIGWANGALA

Rais Dk. John Magufuli akiwapa pole mke wa Waziri wa Maliasili na Utalii Dk. Hamis Kigwangalla,  Dk. Bayoum Kigwangalla na Hawa Mushi, nyumbani kwa Waziri Kigwangalla, Victoria Jijini Dar es Salaam, leo, kufuatia msiba wa kifo cha Mtoto Zul Hamis Kigwangala, kilichotokea Februari 21, 2019 katika Hospitali ya Taasisi ya Moyo ya Jakaya Kikwete Jijini Dar es Salaam.
Share:

SALAMU ZA POLE KUFUATIA AJALI ILIYOUA WATU 19 SONGWE

Mkuu wa Mkoa wa Songwe Brig. Jen. (Mst) Nicodemus Mwangela akitoa salamu za pole kwa niaba ya Rais wa Jamhuri wa Muungano wa Tanzania Dkt John Pombe Magufuli kwa ndugu, jamaa na marafiki wa wafiwa, kufuatia ajali ya gari iliyosababisha vifo 19.
Share:

Thursday, February 21, 2019

MABOMA ZAIDI YA 20 YACHOMWA MOTO MPAKANI MWA ARUMERU NA MONDULI MKOANI ARUSHA

 Nyumba maarufu kwa jina la Maboma zaidi ya 20 ya wafugaji katika eneo la Mfereji mpakani mwa wilaya ya Monduli na Arumeru yamechomwa moto kwa kile kinachoelezwa kuwa ni migogoro ya ardhi ya wafugaji katika maeneo hayo. Pichani, Mkuu wa Wilaya ya Arumeru Jerry Murro, akitazama moja ya nyumba iliungua katika tukio hilo.
 Mkuu wa Wilaya ya Arumeru Jerry Murro, akitazama mwananchi aliyedhurika baada ya nyumba yake kuundu katika tukio hilo.
Moja ya nyumba iliyoungua katika tukio hilo.
Share:

MAJALIWA: VIONGOZI WA CCM ZINGATIENI KATIBA YA CHAMA KATIKA KUTEKELEZA MAJUKUMU YENU

<Mjumbe wa Kamati Kuu ya Halmashauri Kuu ya Chama Cha Mapinduzi (CCM), Waziri Mkuu Kassim Majaliwa akifungua Mkutano wa Halmashauri Kuu ya Chama Cha Mapinduzi Mkoa wa Kagera uliofanyika katika ukumbi wa ELCT mjini Bukoba, mkoani Kagera, leo Februari 21, 2019. (Picha na Ofisi ya Waziri Mkuu)
-------
Na Mwandishi Maalum, Bukoba
WAZIRI Mkuu Kassim Majaliwa amewataka viongozi wa Chama Cha Mapinduzi (CCM) wahakikishe wanatekeleza majukumu yao kwa kuzingatia katiba ya chama ili kuepusha migogoro kwenye maeneo yao.

Amesema chama chochote ambacho viongozi wake hawazingatii katiba lazima kiwe na migogoro kwani uzingatiaji wa katiba ni miongoni mwa mambo yanayokitofautisha Chama Cha Mapinduzi na vyama vingine vya siasa nchini.

Ametoa agizo hilo leo (Alhamisi, Februari 21, 2019) wakati akizungumza na viongozi wa CCM, wabunge pamoja na baadhi ya viongozi wa mkoa wa Kagera kwenye Kikao cha Halmashauri Kuu ya CCM Mkoa wa Kagera kilichofanyika katika ukumbi wa ELCT.

Waziri Mkuu ambaye pia ni Mjumbe wa Kamati Kuu ya CCM Taifa na Mlezi wa CCM mkoa wa Kagera amesema ni muhimu kwa viongozi hao kusoma na kuizingatia katiba ya chama kwa sababu inaelekeza misingi yote ya utendaji.

Amewasisitiza wanachama na wapenzi wa CCM wasome katiba ya chama na kuzielewa kanuni, taratibu na sera ili waweze kutekeleza majukumu yao ipasavyo. Akisisitiza jambo hilo Waziri Mkuu amegawa nakala za katiba ya hiyo kwa viongozi hao na kuwataka wazifikishe hadi kwenye ngazi ya mashina.

Kadhalika, Waziri Mkuu amesema utekelezaji wa Ilani ya CCM ya mwaka 2015/2020 kwa nchi nzima unaendelea vizuri na kuhusu changamoto zilizopo katika baadhi ya maeneo nchini wanaendelea kuzirekebisha.

Amesema lengo lao ni kuhakikisha wanatekeleza ilani kama CCM ilivyoelekeza na ili kujiridhisha kama wanafanya vizuri lazima viongozi wawasimamie watendaji katika maeneo yao na watakapobaini kasoro wasisite kutoa taarifa.

Waziri Mkuu amesema viongozi chama lazima wajiridhishe kama huduma za maji, elimu, miundombinu ya barabara, kilimo pamoja nishati ya umeme zinapatikana kwenye maeneo yao yote na ni kwa kiasi gani.

Share:

Select Language

CCM Blog VIEWERS

All posts in this blog

General comments/advise

CCM Blog. Powered by Blogger.