DC MWENDA: NDULUNGU TULIENI SERIKALI INAENDELEA KUPANGA NA KUTEKELEZA MIPANGO YA KUWALETEA MAENDELEO

Na Hemed Munga, Iramba, Singida.
Mkuu wa wilaya ya Iramba mkoani Singida, Suleiman Mwenda amewasihi wananchi wa kijiji cha Ndulungu kuwa na subira wakati serikali ikiendelea kupanga na kutekeleza mikakati ya kuwaletea wananchi hao miradi ya maendeleo.

Mwenda ameyasema hayo mwishoni mwa juma hili wakati alipokutana na wananchi wa kijiji cha Ndulungu wilayani hapa.

Usia huo unatokana na agizo alilolitoa Mkuu huyo wa wilaya wiki moja iliyopita kuitaka Kamati ya Maendeleo ya Kata ya Ndulungu kukubaliana kuchagua kati ya takribani Sh. milioni 350 zinazotarajiwa kutengeneza barabara kijiji cha Ndulungu na takriban  Milioni Sh. 250 kwa ajili ya kujenga kituo cha afya kijiji cha Mwandugyembe ndani ya kata hiyo.

Miradi hii ilidaiwa kuzua mgogoro kati ya wananchi wa kijiji cha Mwandugyembe kunakotarajiwa kujengwa kituo cha afya huku kijiji cha Ndulungu itengenezwa barabara, jambo ambalo wananchi wa kijiji cha Ndulungu hawakukubaliana nalo wakidai kuwa miradi mingi inapelekwa katika kijiji cha Mwandugyembe.

Akieleza maamuzi ambayo yalifikiwa na Chama cha Mapinduzi (CCM) ngazi ya kata hiyo, Kijiji cha Ndulungu na Kamati ya Maendeleo ya kata hiyo, Mwenda alisema CCM waliamaua kituo hicho cha afya kijengwe Mwandugyembe kwa sababu ndio maelekezo ya muongozo toka serikali kuu. Huku muhtasari wa kijiji cha Ndulungu wakiamua kuwa kituo hicho kijengwe Ndulungu wakati muhtasari wa Kamati ya Maendeleo ya Kata wakiamuwa kuwa kituo hicho kijengwe kijiji cha Mwandugyembe.

“Hivyo ndugu zangu ni dhahiri serikali kuu walizingatia sababu nyingi za kujenga kituo cha afya Mwandugyembe, hata maamuzi ya CCM pamoja na Kamati ya Maendeleo ya kata yamehitaji kituo hicho kijengwe Mwandugyembe, hivyo niwaombe wananchi wa Ndulungu kuwa na subira serikali itajenga kituo cha afya Ndulungu kadri uwezo utakavyoruhusu.” Aliomba Mwenda

Aidha, aliongeza kuwa serikali itafikisha huduma ya afya katika kila kijiji ndani ya kata huku akitolea mfano wa huduma ya umeme ambayo kwa wilaya ya iramba yenye vijiji 74 ambapo vijiji 60 vinaumeme na vijiji 14 tayari mkandarasi ameisha patikana kufikisha umeme katika vijiji hivyo.

Akitoa shukrani mbele ya mkuu huyo wa wilaya Mwenyekiti wa Chama cha Mpinduzi (CCM) wa kata hiyo, Said Hassan aliomba kuwa jambo hili liendelee kuelezewa vizuri zaidi.

“Nikushukuru Mkuu wa wilaya na timu yako kwa namna ambavyo umejitahidi kulielezea na kutatua mgogoro huu, hivyo tunaomba kadri uwezo utakavyokuwa ukipatikana basi tuelekeze maendeleo kijiji cha Ndulungu.” Alisema

Kwa upande wake mmoja wa wananchi wa kijiji hicho, Mwanaidi Nyauli alisema kuwa yote yalioongelewa na Mkuu huyo wa wilaya yamezidi kuwatia uchungu.

“Kwa kweli tunamachungu kwa sababu mnada umepelekwa Mwandugyembe, sekondari imejengwa Mwandugyembe na sasa kituo cha afya kinajengwa Mwandugyembe, Jamani serikali tunaomba mtuonee huruma na sisi wa Ndulungu mtufanyie hima tupate kituo cha afya.” Alisema

Naye Jafari Kamoko akasema kuwa kituo cha afya kilipaswa kijengwe Ndulungu kwa sababu Mwandugyembe tayari wamepata mnada na shule ya sekondari.

Aidha, alieleza kuwa swala la kila kitu kinapelekwa Mwandugyembe kinafanya wananchi waone kuwa kuna upendeleo.

Mkuu wa wilaya ya Iramba mkoani Singida, Suleiman Mwenda akizungumza na wananchi wa kijiji cha Ndulungu wilayani humo, mwishoni mwa wiki hii. (Picha na Hemedi Munga)