UONGOZI SIYO UTUKUFU BALI NI WAJIBU UNAOAMBATANA NA DHAMANA-CHONGOLO

 

Na Jacqueline Liana

KATIBU Mkuu wa Chama Cha  Mapinduzi (CCM}, Daniel Chongolo, amesema uongozi siyo ukubwa wa kutaka utukufu, bali ni wajibu unaoambatana na dhamana.

Amekemea tabia aliyoita ya hovyo ya baadhi ya wana-CCM ya kupanga safu za uongozi kinapofika kipindi cha uchaguzi wa viongozi.

Ameyasema hayo leo Julai 7,2021 katika wilaya ya Sumbawanga Vijijini, mkoa wa Rukwa, ambako yuko kwa ziara ya kikazi katika mikoa ya Rukwa, Mbeya na Songwe, akiwa amefuatana na wajumbe wa sekretarieti ya CCM taifa, Komredi Ngemela Lubinga, Komredi Shaka Hamdu Shaka na Komredi Kenani Kihongosi.

Chongolo alikuwa akizungumza na viongozi na watendaji wa CCM wa mkoa wa Rukwa katika kikao kilichofanyika Sumbawanga Vijijini, na kufafanua kwamba, lazima kila kiongozi ajiulize amewafanyia nini wale anaowaongoza.

"Ukiwa kiongozi lazima ujiulize nini umekitendea chama na wanachama, ukiitwa mwenyekiti siyo kwa sababu ya shati ulilovaa au viatu ulivyopiga kiwi au mtindo wa nywele ulionyoa," alionya Chongolo.

"Uongozi ni wajibu wa kujua ni kipi chenye masilahi kwa chama," alisema na kunukuu kauli ya Baba wa Taifa Mwalimu Nyerere kwamba "uongozi ni mzigo".

Alisema kwamba mwaka 2022 ni mwaka wa uchaguzi ndani ya CCM na ni wakati wa kuwapata viongozi bora na siyo wale wanaopangwa kwa masilahi binafsi.

Chongolo alisema kwamba miongoni mwa wana-CCM kuna wanaofaa kuwa viongozi lakini hawana kimbelembele kama wale wanaondekeza upangaji wa safu.

Alisema wanachama wenye sifa za kuwa viongozi hapana budi washawishiwe wagombee nafasi za uongozi katika chama.

Akimnukuu tena Mwalimu Nyerere, Chongolo alitaka wanaokimbilia uongozi kuogopwa kama ukoma.

"Eti kuna mwingine anajipanga kuwa  kiongozi...niwaombeni mhakikishe hamruhusu watu wanaopanga safu. Watu wazuri hawana tabia ya kimbelembele kutaka madaraka," alisema.

Aliitaja kazi nyingine na viongozi ni kuwaandaa viongozi wa baada yao, kwa sababu uongozi ni kupokezana vijiti.

"Mtu huwezi kuwa kiongozi milele," alisema na kuhoji kwanini mtu ang'ang'anie madaraka?