LUBINGA AKEMEA WAPIKA MAJUNGU

 

Na Jacqueline Liana, Sumbawanga

KATIBU wa Halmashauri Kuu ya Taifa (NEC) ya CCM, Kanali mstaafu Ngemela Lubinga, amewataka viongozi na watendaji wa chama hicho kuepuka majungu.

Lubinga alisema hayo Julai 7, 2021 alipokuwa akizungumza na wanachama wa CCM katika ngazi za mashina wilayani Sumbawanga Mjini, katika mkoa wa Rukwa.

Alisema kwamba CCM ina utaratibu mzuri wa kushughulikia changamoto za viongozi na watendaji wake, hivyo hakuna haja ya kupigana majungu.

Kiongozi huyo aliwataka  wana-CCM kuonyeshana upendo na iwapo atatokea mwenye kwenda kinyume na maadili ya chama, arekebishwe kwa staha kupitia vikao vya chama.

Kuhusu masuala yanayozungumzwa na kujadiliwa katika vikao hivyo, alisema  wajumbe wanapaswa kuwa na vifua vya kutunza siri kwani ni kinyume cha maadili kutoa siri za vikao.

Alisema moja ya sifa ya kiongozi bora ni uwezo wa kutunza siri kwa masilahi ya CCM.

Kuhusu uchaguzi wa viongozi wa CCM katika ngazi mbalimbali utakaofanyika mwakani, Kanali mstaafu Lubinga aliwataka wanachama wa CCM kuwachagua wagombea watakaokuwa watumishi wazuri wa CCM.

Alisema wapo viongozi na watendaji wa chama 'huwabeba' wagombea na kusababisha mitafaruku isiyo na tija kwa chama.

Kiongozi huyo alifafanua kwamba, tabia hiyo ni miongoni mwa sababu za uwepo wa makundi yasiyo na masilahi kwa chama na wanachama, hivyo hapana budi ikome.

"Viongozi tusibebe wagombea, ukibeba mgombea umepoteza sifa ya kuwa kiongozi na mtendaji wa chama chetu," alionya.

Kuhusu changamoto zinazowakabili wanachama na wananchi kwa jumla, aliwataka viongozi na watendaji wa CCM kutenga muda wa kusikiliza kero na kuzitafutia majawabu.

Alisema, ilani ya uchaguzi ya CCM ya 2020-2025, imelenga kuondoa kero mbalimbali katika jamii, hivyo utekelezaji wake unapaswa kusimamiwa kwa makini.

Alisema ilani hiyo ina ahadi za maendeleo zinazotekelezwa nchini kote, hivyo ni wajibu wa viongozi na watendaji wa CCM, kuanzia ngazi za mashina,  kuhakikisha zinatekelezwa kwa ufanisi.

Alifafanua kwamba serikali inatoa fedha za utekelezaji wa miradi ya maendeleo, hivyo ni lazima zitumike kwa kusudi hilo.

Pamoja na kuzungumza na wanachama wa CCM katika ngazi za mashina, pia kiongozi huyo alikagua na kushiriki katika ujenzi wa madarasa katika shule za msingi za Isale na Manga za Sumbawanga Mjini.