KATIBU MKUU KIONGOZI IKULU YA ZANZIBAR AIPONGEZA GEL KWA KUZALISHA WATAALAM

Na Dismas Lyassa.

Katibu wa Baraza la Mapinduzi Zanzibar na Katibu Mkuu Kiongozi Ikulu Zanzibar, Mheshimiwa Zena Said (pichani) amepongeza kazi zinazofanywa  na Kampuni ya Global Education Link (GEL) katika sekta ya elimu nchini na kushirikiana katika kusaidia kuzalisha wataalam.

Pongezi hizo zimetolewa wakati alipotembelea mabanda ya kampuni ya GEL katika maonyesho ya vyuo vikuu yanayoendelea kwenye viwanja vya Mnazi Mmoja jijini Dar es Salaam.

Kwenye maonyesho hayo yanayoshirikisha vyuo vikuu mbalimbali nchini, GEL imefanikiwa kuleta vyuo vikuu 10 ambavyo ni washirika wake nje ya nchi kwa ajili ya kuja kuelezea fani wanazotoa na namna Watanzania wanavyoweza kujiunga na vyuo vyao.

Vyuo hivyo ni Chandigarh, Lovely Professional University, CT, Maharish Makandeshwar, Pandeet Deendayal Energy, Sharda, Rayat Bahra vya India na V.N. Karazin Kharkiv na Sumy State vya Ukraine.

Katibu mkuu huyo kiongozi alisema ni kweli kutokana na uhaba wa fani mbalimbali hapa nchini, baadhi ya wanafunzi wanalazimika kwenda nje ya nchi kusoma elimu ya juu hivyo kuwa na kiunganishi ni jambo la msingi katika kurahisisha upatikanaji wa vyuo hivyo.

“Ni kweli vyuo vyetu haviwezi kuchukua wanafunzi wote kwa sasa, nawapongeza kwa kazi hii ya kuwaunganisha wanafunzi wetu na vyuo vya nje,” alisema katibu mkuu kiongozi huyo huku akishangiliwa na umati wa wazazi na vijana waliofurika katika mabanda 21 yanayotumiwa na GEL pamoja na washirika wake kufanya maonyesho.

Mkurugenzi wa GEL, Abdulmalick Mollel alimweleza katibu mkuu kiongozi huyo kuwa kampuni yake imekuwa ikishirikiana na vyuo vya nje kuwapeleka wanafunzi wa Tanzania kwa kozi mbalimbali ikiwemo kuzungumza na vyuo vya ndani ili viweze kubadilishana wanafunzi (exchange program).

Mollel alisema wakati nchi nyingi duniani zina kozi nyingi za afya, kwa Tanzania bado hazijawa za kutosha hivyo wanafunzi wanaotaka kozi hizo na nyinginezo nyingi ambazo bado hazipatikani nchini, wamekuwa wakiwaunganisha kwenda kusoma kwenye nchi hizo.

“Tumezungumza na vyuo vingi vya nje ya nchi kwamba sisi tuna wanafunzi wengi na wamekubali kuwachukua wanafunzi wa Kitanzania kwa gharama nafuu; zinazofanana na za hapa ndani ya nchi yetu,” alisema Mollel na kuongeza kuwa baadhi ya vyuo vimeahidi kufungua matawi nchini baada ya kuona mahitaji makubwa ya kozi wanazofundisha ambazo wanafunzi wa Tanzania wamekuwa wakizifuata katika mataifa yao.