CCM YAMLILIA TEDDY MAPUNDA, SHAKA AMWAKILISHA CHONGOLO KUAGA MWILI, DAR

Mbezi Beach, Dar es salaam

Chama Cha Mapinduzi (CCM ) kimemtaja marehemu Magdalena Theresia (Teddy) Hollo Mapunda kuwa alikuwa ni mdau muhimu na mshirika kinara wa shughuli za maendeleo ya Taifa, ambapo wakati wa uhai wake alishirikiana vyema na Chama na Serikali kupitia tasnia ya habari, hivyo Taifa limempoteza Mtanzania makini aliyejengeka vyema katika misingi ya uzalendo na utaifa.

Hayo yamesemwa na Katibu wa Halmashauri Kuu ya Taifa (NEC) ya CCM, Idara ya Itikadi na Uenezi Shaka Hamdu Shaka wakati akizungumza na baadhi ya vyombo vya habari kabla ya mazishi kufanyika ya Teddy, nyumbani kwa marehemu, Mbezi Beach, jijini Dar es Salaam.

Shaka ambaye alimwakilisha Katibu Mkuu wa CCM Daniel Chongolo kwenye tukio hilo la kuaga mwili amemtaja Teddy kuwa alikuwa Mtanzania aliyependa sana tasnia ya habari na kuhakikisha habari muhimu zinawafikia wananchi wanaoishi vijijini na mijini kwa haraka na usahihi.

"Marehemu Teddy atakumbukwa kwa tabia yake ya kupenda ucheshi, huruma na upendo akiwa si mwenye majivuno , asiyedharau wenzake lakini pia hakupenda kujikweza na kuwakoga watu.

Teddy alikuwa na kiu na mbinu za uwezeshaji wa kutosha ili habari ziweze kuwafikia wananchi na kuitangaza nchi yake hasa alipokuwa akifanyakazi katika mbuga ya wanyama ya Taifa Serengeti", akasema Shaka Hamdu Shaka na kuongeza;

"Hayati Teddy sifa yake kubwa ilikuwa ni unyenyekevu, ucheshi na moyo wenye Haruna. Alikuwa ni mtanzania mzalendo, mtaifa na mchapakazi aliyependa kuona umoja wa kitaifa ukidumu nchini".

Shaka akasema, Teddy atakumbukwa sana kwa tabia yake na mwenendo bora na adilifu kwani hakuwa mtu mbabaishaji na asiyevunja wala kutotimiza miadi mnapowekeana ahadi kwani aliheshimu wakati.

"Tuige maisha aliyoishi mwenzetu hapa duniani kwani hakuwa mtu wa majivuno. Hakuwa akivunja miadi pia hakupendelea wala kuwa na roho ya korosho. Mikono yake haikuwa kama ile ya birika, badala yake alipenda kuwasaidia wenzake kila alipoweza na kuitazama jamii" Alieleza.

Aidha shaka alisema ni watu wachache mno duniani pale wanaopata nafasi hujikuta wakizitumia vibaya kuwakomoa wenzao, kuwanyanyasa na kuwapuuza wengine jambo ambalo katika maisha ya Teddy ilikuwa ni kinyume na hivyo.

Shaka amewahimiza watu wengine kutambua kuwa wanadamu katika dunia wana safari fupi hivyo isiwaghilibu badala yake kila mmoja ajijue iko siku ataondoka duniani na kurudi kwenye vumbi.

"Chama Cha Mapinduzi kinatuma salamu za rambirambi kwa familia ya marehemu na kumuomba Mwenyezi Mungu awape familia, Ndugu, jamaa na marafiki wa Teddy, subira na uvumilivu katika kipindi hiki kigumu kwao cha msiba na maombolezo na tunaungana na wafiwa wote kumuomba Mungu amuweke mahali pema peponi", akamalizia Shaka.

Katibu wa NEC, Itikadi na Uenezi wa CCM Shaka Hamdu Shaka akitoa heshima kwa mwili wa aliyekuwa Mdau wa Maendeleo, Teddy Mapunda, wakati wa kuagwa mwili wa marehemu, Mbezi Beach jijini Dar es Salaam, jana. Shaka alimuwakilisha Katibu Mkuu wa CCM Daniel Chongolo.

Katibu wa NEC, Itikadi na Uenezi wa CCM Shaka Hamdu Shaka akimpa pole aliyekuwa Mume wa Marehemu Teddy Mapunda, Nestory Mapunda, wakati wa kuagwa mwili wa marehemu jijini Dar es Salaam, jana

Katibu wa NEC, Itikadi na Uenezi wa CCM Shaka Hamdu Shaka akiwa na waombolezaji wengine wakati wa kuagwa mwili wa marehemu Teddy Mapunda, jijini Dar es Salaam, jana