CCM YAITAKA SERIKALI KUTOYUMBA KATIKA MCHAKATO UCHAGUZI SERIKALI ZA MITAA, WAELEZA WALIVYOJIPANGA KUHAKIKISHA WANASHINDA ILI KUWATUMIKIA WATANZANIA

*Yasema upinzani wamechungulia mapema wameona hawana nafasi ya kushinda, ndio maana wamejitoa 

Na Said Mwishehe,Michuzi Globu ya jamii.

WAKATI Vyama vya siasa upande wa upinzani nchini vikiwa vimetangaza kujitoa kwa kutoshiriki Uchaguzi wa Serikali za Mitaa mwaka huu wa 2019 unaotarajia kufanyika Novemba 24, Chama Cha Mapinduzi(CCM) kimesema kinatambua umuhimu na thamani ya uchaguzi huo, hivyo kitashiriki kikamilifu huku kikitoa rai kwa Serikali kutoyumbishwa na yoyote.

Pia CCM imeeleza kwa kina hatua mbalimbali za mchakato za uchaguzi huo ambazo zimefanyika na katika hatua kadhaa muhimu vyama vya upinzani vimeshiriki hatua kwa hatua na cha kushangaza baada ya kuchukua fomu na kuzirejesha wametangaza kutoshiriki kwa kutoa sababu ambazo imedai sio za msingi wowote.

Akizungumza leo Novemba 13 mwaka 2019, mbele ya waandishi wa habari jijini Dar es Salaam Katibu wa Itikadi na Uenezi wa Chama Cha Mapinduzi(CCM) Haumphrey Polepole ameeleza pamoja na mambo mengine uchaguzi huo wa Serikali za Mitaa unaendeshwa kwa sheria, kanuni na miongozo na hatua mbalimbali za uandaaji wa kanuni na miongozo vyama vya upinzani walipata nafasi ya kushiriki.

"Tunazo kanuni ambazo sote tumeshiriki kwa kuweka maoni yetu tangu mwanzo , ipo kanuni imeeleza kwa kina mchakato wa uchaguzi lakini kama haitoshi kanuni hiyo imewekewa muongozo wa vijiji na mitaa kuhusu uchaguzi utakaofanyika Novemba 24 mwaka huu.Kama haitoshi kanuni na muongozo umeweka kalenda ikiwemo ya kutoa tarehe ya siku ya kufanyika uchaguzi na sote tumeshiriki, ukaja mchakato wa kufuatilia uchaguzi wwote tukashiriki, ikaja hatua ya majina na mipaka ya vijiji na kisha yakafanyika mambo mengine.

"Ukaja mchakato wa uandikishaji wa upigaji kura lakini zoezi hilo, pia lipo katika uchaguzi wa serikali ya mtaa lakini misingi ni mmoja tu kuandikisha kwenye daftari la mpiga kura na wakati huo huo kuhamasisha wapiga kura kujiandikisha.Sheria inazuia wanasiasa kutoa elimu ya mpiga kura na sisi CCM tumejizuia katika hilo.Hivyo tulitumia mikutano ya ndani na CCM kuandaa wanachama wetu kwa kutumia taasisi za kimuundo ambazo tunazo ndani ya Chama.

"Wenzetu(vyama vya upinzani) wakavunja utaratibu kwa kwenda hadharani pamoja na kutumia mitandao ya kijamii na maeneo mengine. Hata hivyo tuliamua kukaa kimya maana ni kawaida yao.Hilo likapita na kisha ikaja hatua ya kukagua orodha ya wapiga kura, sote pamoja na wapinzani tukamaliza hilo.Nataka kueleza kitu hapa mwaka 2014 wenzetu walitufanyia uhuni walihamisha wapiga kura kutoka kitongoji kimoja kwenda kingine na wakifika huko wanapiga kura,"amesema.

Polepole ameongeza kuwa katika uchaguzi wa mwaka huu wa Serikali za mitaa tumekuwa makini kwa kuhakikisha wanaopiga kura ni watu wa eneo husika.Baada ya kupita hatua zote hizo, CCM waliamua kuingia katika mchakato wa ndani wa kupata wagombea wao kwa kufuata tararibu za Chama, ambapo wamehakikisha demokrasia inatumika kwa kila mtu kupata haki inayostahili.

"Hapo tuliangalia nani anaweza kusimama kwa niaba ya CCM.Mchakato huo umefanyika katika ngazi mbalimbali na kwa umakini mkubwa, CCM tunatambua umuhimu wa uchaguzi huu na hivyo tumejiandaa vya kutosha ikiwa pamoja na kutoa elimu kuandaa watu wetu kuhakikisha sheria, kanuni na muongozo wa uchaguzi unafuatwa,"amesema Polepole.

Amesema kwa bahati mbaya wenzao wa upinzani hawakuwa na mchakato wa kupata wagombea wao , hivyo CCM na upinzani wakaja kukutana tena tarehe 29 wakati wa kuchukua fomu za kugombea."Tuliwauliza wenzetu vipi mchakato wa ndani wao hakuwa na majibu zaidi ya kuchukua fomu tu.Mchakato wa ndani kwa CCM ilikuwa nafasi tosha ya watu kujinoa, hivyo haikuwa tatizo kujaza fomu.Huenda wenzetu walikuwa wanataka kuchukua wale ambao wataondoka CCM baada ya kumalizika kwa mchakato wetu wa ndani, lakini safari hii hilo hakuna wote waliopata nafasi na waliokosa tumebaki wamoja".

Amefafanua kwamba, baada ya CCM kubaki wamoja, upinzani ndipo ulipoanza mizengwe na wakawa wa kwanza kwenda kulalamika ili kuonesha wanaonewa wakati kabla ya hapo hatua zote walishiriki kikamlifu na kuongeza sheria iko wazi kwa wale ambao watakuwa na matatizo ya fomu zao na wanahisi wameonewa wanayo nafasi ya kukata rufaa, lakini wapinzani waliamua kujitoa badala ya kufuata taratibu za kisheria.

"Wakati hawa wenzetu wanabwaga manyanga wapo waliokuwa wamechukua fomu, wengine majina yao yamepitishwa na wengine wamekata rufaa na sheria iko wazi ukihisi umeonewa kata rufaa lakini wenzetu kabla ya hatua ya kukata rufaa wakawekwa mpira kwapani.Kumekuwa na matamko kadhaa yametokea.Chadema ,ACT Wazalendo, NCCR-Mageuzi wametangaza kujitoa na hata Chama cha Hashim Rungwe nacho kimetangaza kujitoa.Huyu Rungwe sijawahi kuona uongozi wake wa taifa, sijawahi kuona kikao chao cha halmashauri kimekaa, hata takwimu zao za uchaguzi uliopita chama cha Rungwe hakikuambulia kitu.

"Hatukumuona akienda kuchukua fomu, kurejesha fomu, hakukwenda kukata rufaa, lakini baada ya vyama vya upinzani kuanza kujitoa naye Rungwe akaita waandishi wa habari kujitoa, niliuliza kajitoa katika nini?Maana hakuwepo.Baada ya hapo wameanza kutoa matamko mbalimbali na hapa nasisitiza katika hilo tulitoa msisitizo kwa Serikali isiyumbe kwenye jambo hilo maana hilo ni jambo la kisheria na katika sheria sote tulikubaliana na ndio maana tulishiriki mpaka kuchukua fomu.

"Mtu akikosea masuala ya sheria, sheria ni msumeno, na ukikosea katika sheria haina huruma , sisi tunawashukuru sana wana CCM na Watanzania kwa kutuunga mkono.Tuliamua kupeleka jeshi la wanasheria na mawakili nchi nzima kwa ajili ya kutoa elimu pamoja na kusaidia mchakato wa kujaza fomu ambalo ni hatua ya kisheria, wenzetu walishindwa kujaza majina, wadhamini, namna ya kuandika majina sawasawa kwa mujibu wa tangazo la serikali kijiji kinaitwajwe, na hayo yote wenzetu hawakuwa nayo maana hawakujiandaa na mchakato wa uchaguzi,"amesema Polepole.

Hata hivyo amesema kwa takwimu zilizopo vyama vya upinzani ambao wamechukua fomu ni ndogo ukilinganisha na ya CCM na hata ya waliorudisha fomu nao ni ndogo, kwa maana hiyo CCM kabla hata yauchaguzi kufanyika tayari imeshapata asilimia za ushindi na katika maeneo mengine hakuna hata mpinzani mmoja aliyechukua fomu kwa ajili ya uchaguzi huo."Hadi sasa tunavyoongea kuna mitaa tumaeshachukua maana wenzetu hawapo kabisa huko.Na hii ndio imewatisha na kuamua kuweka mpira kwapani maana ushindi wetu hautakuwa wa sunami bali ni ushindi kama wa upepo wa kisulisuli maana ndio habari ya mjini".

Ameeleza katika uchaguzi wa Serikali za Mtaa CCM wanakwenda wakiwa na ushahidi ambao unaonekana kwa macho na kwa vitendo kutokana na kazi kubwa iliyofanywa na Rais Dk.John Magufuli ya kuboresha maisha ya watu kwa kujenga miundombinu ya huduma muhimu za Watanzania na wanatambua kuwa kupitia uchaguzi huo wanataka kupata Wana CCM makini ambao watapata nafasi ya kushinda na kisha kushirikiana na Serikali katika kuleta maendeleo ya wananchi.

"Kutokana na mambo makubwa yamefanywa na Serikali ya Awamu ya Tano chini ya Rais wetu Dk.Magufuli wale watu wa upinzani wamefanya uungwana na hivyo wameona mwaka huu ushindi utakuwa ni wa kisuli suli, na hivyo wameamua kuweka mpira kwapani.Tunaishukuru Serikali katika hili kutoyumba, imebaki na msimamo wake , hawa wenzetu ukitoa mwanya ndipo wanakuja na mambo mengine mengi yakiwemo ya kutaka kuongozewa muda,"amesema.

Hata hivyo ametumia nafasi hiyo kutoa rai kwa TAMISEMI kuhakikisha wanaandaa taarifa za mchakato wa uchaguzi huo na kwa lugha ya Kingereza kwani kinachofanywa na upinzani wanaandika taarifa za uongo na kupeleka kwa mataifa ya Ulaya kuonesha wanaonewa, hivyo TAMISEMI nayo ikiandika kwa lugha ya Kingereza hakutakuwa na sehemu ya kuongopa kuhusu uchaguzi na kila kitu kitakuwa wazi.

"Katika kipindi hiki cha uchaguzi tunafahamu kuna mambo mengi yanayofanyika kuna watu wachache wasioitakia mema nchi yetu, hivyo watataka kutumia nafasi hii kutuvuruga.Tunatambua ushirikiano wetu na mataifa mengine lakini katika mambo ya ndani ni vema wakaheshimu mikataba iliyopo ya nchi mmoja kutoingilia nchi nyingine kwa mambo yake ya ndani,"amesisitiza.

Hata hivyo amesema sio vizuri kutoa siri ya uchaguzi, lakini ameeleza ambavyo CCM wamejipanda katika uchaguzi kwa kila idadi ya wanachama ambao wamewekwa kusimamia uchaguzi huo na kufanya kampeni ambapo kwa idadi yao inatosha kabisa CCM kuifanya ishinde na hilo hawana shaka nalo na kuongeza kinachoonekana upinzani wanataka kucheza mchezo wa kombolela lakini wao wamejipanga imara na uchaguzi huo ni muhimu, hivyo hawatakuwa na mchezo wa aina yoyote.