LOWASSA AJIRUDIA ZAKE CCM, LEO. ASEMA AMERUDI NYUMBANI.

<Aliyekuwa mgombea Urais kwa tiketi ya Chadema katika Uchaguzi Mkuu uliopita, wa mwaka 2015, Waziri Mkuu wa zamani, Edward Lowassa, akizungumza baada ya kutangaza kurudi Chama Cha Mapinduzi (CCM) leo. Kushoto ni Mwenyekiti wa CCM Rais Dk. John Magufuli na Kulia ni Katibu Mkuu wa CCM Dk. Bashiru Ally.

Lumumba, Dar es Salaam
Aliyekuwa Mgombea wa Urais kwa tiketi ya CHADEMA ndani ya munganiko wa vyama kadhaa ulioitwa UKAWA wakati wa Uchaguzi Mkuu uliopita, amejitoa upinzani na kujiunga tena na Chama Cha Mapinduzi (CCM).

Lowassa ambaye katika uchaguzi huo wa mwaka 2015 alishika namba mbili kwa wingi wa kura, amehamia CCM leo na kupokewa rasmi na Mwenyekiti wa CCM, Rais Dk. John Magufuli, katika hafla iliyofanyika Ofisi Ndogo ya Makao Makuu ya CCM, Lumumba jijini Dar es Salaam.

"Nimerudi nyumbani. Kazi nzuri na ya kihistoria inayoendelea kufanyika kwenye nchi yetu kwa hakika hakuna haja ya kuendelea kuwa mpinzani wa maendeleo haya na sasa nipo tayari kushirikiana na wana CCM wenzangu kuijenga nchi yetu kwa kuiletea maendeleo chini ya Ndugu John Magufuli Mwenyekiti wa CCM na Rais wa Tanzania", amesema Lowassa akizungumza baada ya kupokewa na Dk. Magufuli.

Akizungumza na hadhara iliyojitokeza katika Ofisi Ndogo ya Makao Makuu ya CCM Lumumba, kushuhudia tukio hilo,  Rais Dk. Magufuli amesema  miongoni mambo yaliyomshawishi kumpokea Lowassa ni uungwana alio nao Waziri mkuu huyo wa zamani.

"Mzee Lowassa amekuwa mtu muungwana sana, alikuwa CCM, alihama lakini ameomba kurudi nyumbani na mimi ninampongeza sana, hata katika dini tunafundishwa kusamehe, karibu tujenge Tanzania yenye umoja na isiyo na migogoro ya kisiasa maana Maendeleo hayana Chama", alisema Dk. Magufuli.

Katibu wa NEC, Itikadi na Uenezi Humohrey Polepole, amesema, Lowassa aliwasili mida ya alasiri katika Ofisi Ndogo ya Lumumba ambako kulikuwa na kikao cha Wakuu wa Chama kilichokuwa kikiendelea.