NMB YATWAA TUZO MAREKANI

 Benki ya NMB imetwaa tuzo ya Best Bancassurance Innovation and Partner of the Year – Tanzania 2026 kutoka World Economic Magazine. Tuzo hiyo, iliyotangazwa na taasisi hiyo yenye makao Delaware, Marekani, imetambua matumizi ya teknolojia na ushirikiano wa NMB katika kupanua huduma za bima.

Kupitia chatbot ya JIRANI, wateja wanaweza kutumia WhatsApp kununua bima za magari na maisha ya vikundi, kuwasilisha nyaraka, kupata kumbukumbu za malipo na kuanzisha madai.

Aidha, UmeBima Mini App ndani ya NMB Mkononi Super App imeunganisha huduma za bima na shughuli nyingine za kila siku za kifedha.

Afisa Mkuu wa Wateja Binafsi na Biashara wa NMB, Filbert Mponzi, alisema tuzo hiyo ni uthibitisho wa juhudi za benki na washirika wake katika kurahisisha upatikanaji wa bima na kuwafikia Watanzania wengi zaidi. Mkuu wa Idara ya Bima wa NMB, Martine Massawe, aliongeza kuwa huduma za JIRANI na UmeBima zimepunguza muda na hatua anazopitia mteja ili kupata huduma za bima.

Kwa zaidi ya wateja milioni 10, matawi 251 na vituo zaidi ya 75,000 vya NMB Wakala, benki hiyo ina mtandao mpana wa kufikisha bima kwa kaya, vikundi na biashara nchini. Hatua hiyo ni muhimu katika soko ambalo uwiano wa malipo ya bima kwa Pato la Taifa ulifikia asilimia 2.08 mwaka 2024.