RAIS WA POLAND ATUA NCHINI JANA USIKU, KUPOKEWA RASMI NA RAIS DK. SAMIA IKULU JIJINI DAR ES SALAAM, LEO

JNIA, Dar es Salaam
Rais wa Poland, Andrzej Duda akiwa na mkewe Agata Kornhauser-Duda amewasili nchini kwa ajili ya ziara ya Kitaifa ya siku mbili akipokelewa katika Uwanja wa Ndege wa Kimataifa wa Julius Nyerere Jijini Dar es Salaam na Waziri wa Mambo ya Nje na Ushirikiano wa Afrika Mashariki, January Makamba.

Katika mapokezi hayo wameshiriki pia  Waziri wa Fedha Mwigulu Nchemba, Waziri wa Utalii na Mambo ya Kale Zanzibar Mudrick Soraga na viongozi wengine waandamizi wa Serikali na anatarajiwa kupokewa rais na Rais Dk. Samia Suluhu Hassan, leo, Ikulu Jijini Dar es Salaam.

Baada ya kumpokea Rais Dk. Samia na kufanya mazungumzo na Rais huyo na baadaye watazungumza na waandishi wa habari kueleza yaliyojiri.

Taarifa ya Wizara ya Mambo ya Nje na Ushirikiano wa Afrika Mashariki, imeeleza kuwa ziara hiyo ni ya kwanza kwa Rais kutoka Poland kutembelea Tanzania tangu kuanza kwa ushirikiano kati ya nchi hiyo na Tanzania ikilenga kuimarisha ushirikiano katika miradi mbalimbali ya maendeleo kwenye sekta za kilimo, kodi, viwanda na biashara, utalii, elimu, usafiri, afya, tiba za mifugo, na maji.

Kwa kupitia ziara hiyo maeneo mapya ya ushirikiano yataibuliwa kati ya Tanzania na Poland kupitia sekta za ulinzi na usalama, nishati, madini, ulinzi wa mitandao, utamaduni na uchumi wa buluu.

Akiwa nchini, Rais Duda anatarajiwa kutembelea mradi wa matibabu ya dharura katika Hospitali ya Aghakhan, Dar es Salaam kujionea utekelezaji wa mradi huo ambao Serikali ya Poland imetoa msaada wa Dola za Kimarekani milioni 1.136  kufadhili mradi huo wenye lengo la kutoa msaada kwa sekta ya matibabu na kusaidia elimu ya wahudumu wa afya katika mkoa wa Dar es Salaam.

Rais wa Poland, Andrzej Duda akiwasili na mkewe Agata Kornhauser-Duda, katika Uwanja wa Ndege wa Kimataifa wa Julius Nyerere Jijini Dar es Salaam, jana usiku.