MUFT DK. ABUBAKAR ZUBER BIN ALI AGAWA FUTARI KWA WAUMINI

 WAUMINI WANUIFAIKA FUTARI MWEZI WA RAMADHANI

Na HEMEDI MUNGA

WAFANYABIASHARA nchini Tanzania waaswa kuwaonea huruma waumini wa dini ya kiislamu wanaotarajia kuianza ibada adhimu ya swaumu ya Mwezi wa Ramadahani badaa ya kuandama kwa mwezi au kukamilika kwa siku 30 za mwezi wa Shabani mwaka huu.

Wametakiwa kutopandisha bei au ikiwezekana kupunguza bei za bidhaa mbalimbali kwa lengo la kuwawekea wepesi waumini hao watakapokuwa katika ibada hiyo.

Akizungumza na waumini wa dini hiyo waliofika katika viwanja vya Msikiti Mkuu wa Bakwata jijini Dar es Salaam jana, Mufti Mkuu wa Tanzania, Dk. Abubakar Zuber bin Ali anawaasa wafanyabiashara kuwa na huruma hasa katika kipindi hichi cha ibada tukufu ya funga.

Aidha, anasema haitakiwi kwa mtu yoyote hata kwa wafanyabiashara kutengeneza ughali katika bidhaa anazoziuza sio tu katika Mwezi huu Mtukufu hata katika miezi mingine.

‘’Nasaha na usia wangu kwa wafanyabishara wote wawahurumie wafungaji wa Mwezi wa Ramadhani ambao hupata mashaka na tabu ya kushinda njaa na kiu halafu bidhaa zikawa ghali, wafanye huruma ya kupunguza bei ya bidhaa wanazoziuza kwa lengo la kuwafanyia wepesi wafungaji hao,’’ anaasa.

 

Mbali na hilo, anawataka waumini kujiandaa kuupokea Mwezi wa Ramadhani kwa bashasha na kuamini kuwa ndio chuo cha kuwajenga kuwa watu wema na wenye maadili katika jamii.

Akinukuu maneno ya Mtume Muhammad (S.A.w), Dk. Zuber anasema kuwa mtu yeyote atakayefurahi kwa kuingia Mwezi wa Ramadhani inamuwajibikia pepo kutokana na furaha yake.

‘’Ni jambo la kwanza kwa Muislamu Mwezi wa Ramadhani unapoingia ibakie kuwa kwake ni furaha na kufunga kwa kutekeleza masharti, adabu, sunna na nguzo zake,’’ anausia.

Pia, anawataka kujifundisha kuwa na tabia njema kwa sababu Mwezi huo hufundisha waumini kuwa na subra, uvumilivu, upendo, kuwakaribisha watu, kuwa wakarimu na kutoa sadaka kwa lengo la kutafuta swawabu zake.

‘’Ni kipindi ambacho muumini anatakiwa kijitosa katika mambo ya kheri na ukarimu huku akiwa ni mtu mwema atakaye dumu hivyo baada ya Mwezi wa Ramamdhani kuondoka,’’ anaongeza Mufti huyo.

Akiongea katika hafla hiyo, Mkurugenzi wa Da awa na Tablighi Ofisi ya Mufti wa Tanzania, Arif Surya anasema Mufti Abubakar Zuber bin Ali anazindua ugawaji wafutari kwa familia takribani 550.

Aidha, anaongeza kuwa katika familia hizo kila mmoja amefanikiwa kupata mchele kilogramu 20, mafuta ya korie lita tano, maharage kilogramu tano, unga wa sembe kilogramu tano na sukari kilo tatu.

‘’Inshaallwah zoezi hili, amefungua Mufti hapa litaendelea katika mikoa mbalimbali ikiwemo Unguja na Pemba,’’ anasema Surya.

Halikadhalika, anasema wanampango wa kugawa tende kwa sababu  kula tende wakati wa kufungua baada ya kufunga ni mwenendo wa Mtume Muhammad (S.A.W), hivyo watu wasile tende kama chakula bali wale kwa kuzingatia sunna.

Kwa upande wake mmoja wa waumini waliopata futari hiyo, Salimu Liyaga  anasema anafurahi kupata msaada huo na kumuomba Mungu awalipe badala wale wote waliotoa msaada huo.

Anasema, anaamini kuwa futari hiyo itawasaidia yeye na familia yake yenye watu saba katika kipindi hichi cha mwezi wa Ramadhani.

Naye Mkazi wa Kiwalani jijini hapa, Naima Khatibu anatoa shukrani na pongezi kwa Mufti wa Tanzania kwa kuanzisha Ofisi hiyo amabyo imefanikisha wao kupata msaada wa futari.

‘’Tunamuombea kheri Mufti wetu na viongozi wote waliotoa futari hii kuwa na afya njema na wapate badala kwa lengo la kuendelea kuwakumbuka wao,’’ anaomba Naima.

Ibada ya Swaumu ya Mwezi wa Ramadhani ni moja katika nguzo tano za Uislamu ambapo muislamu aliokuwa na akili timamu, aliobaleghe na mwenye afya njema anawajibika kufunga.

Ni ibada ambayo hufungwa siku 30 au 29 ya kila mwaka inapofika Mwezi wa Ramadhani.

Mufti Mkuu wa Tanzania, Dk. Abubakar Zuber  akiwasili katika viwanja vya Msikiti Mkuu wa Bakwata jijini Dar es Salaam leo katika zoezi la kugawa futari kwa  waumini 550,  kulia kwake ni Mkurugenzi wa Da awa na Tablighi Ofisi ya Mufti wa Tanzania, Arif Surya . (Picha na Hemedi Munga)

Mufti Mkuu wa Tanzania, Dk. Abubakar Zuber katikati akimgawia futari Naima Khatibu kushoto punde baada ya kuwagawia futari waumini 550 waliofika katika viwanja vya Msikiti Mkuu wa Bakwata jijini Dar es Salaam leo, kulia ni Mkurugenzi wa Da awa na Tablighi Ofisi ya Mufti wa Tanzania, Arif Surya . (Picha na Hemedi Munga)

Mufti Mkuu wa Tanzania, Dk. Abubakar Zuber katikati akimgawia futari Salimu Liyaga kushoto punde baada ya kuwagawia futari waumini 550 waliofika katika viwanja vya Msikiti Mkuu wa Bakwata jijini Dar es Salaam leo, kulia ni Mkurugenzi wa Da awa na Tablighi Ofisi ya Mufti wa Tanzania, Arif Surya . (Picha na Hemedi Munga)

Baadhi ya waumini waliogaiwa futari toka kwa Mkurugenzi wa Da awa na Tablighi Ofisi ya Mufti wa Tanzania, Arif Surya punde baada ya ugawaji wa futari hiyo kwa familia 550 katika viwanja vya Msikiti Mkuu wa Bakwata jijini Dar es Salaam leo. (Picha na Hemedi Munga)

Baadhi ya waumini waliogaiwa futari toka kwa Mkurugenzi wa Da awa na Tablighi Ofisi ya Mufti wa Tanzania, Arif Surya punde baada ya ugawaji wa futari hiyo kwa familia 550 katika viwanja vya Msikiti Mkuu wa Bakwata jijini Dar es Salaam leo. (Picha na Hemedi Munga)

Baadhi ya waumini waliogaiwa futari wakisikiliza nasaha toka kwa Mkurugenzi wa Da awa na Tablighi Ofisi ya Mufti wa Tanzania, Arif Surya punde baada ya ugawaji wa futari hiyo kwa familia 550 katika viwanja vya Msikiti Mkuu wa Bakwata jijini Dar es Salaam leo. (Picha na Hemedi Munga)

Mkurugenzi wa Da awa na Tablighi Ofisi ya Mufti wa Tanzania, Arif Surya akiwaasa waumini hao kuupokea Mwezi wa Ramadhani na kufunga kikamilifu kwa kuwa wamepatiwa futari punde baada ya ugawaji wa futari hiyo kwa familia 550 katika viwanja vya Msikiti Mkuu wa Bakwata jijini Dar es Salaam leo. (Picha na Hemedi Munga)