MWENYEKITI MPYA UWT NI MARY CHATANDA, AMSHINDA DK. KABAKA KURA 308, KATE KAMBA APATA KURA 8

Na Bashir Nkoromo, CCM Blog
Mary Chatanda ametwaa ushindi na kuwa Mwenyekiti mpya wa Umoja wa Wanawake Tanzania (UWT) baada ya kujizolea kura 527 akimshinda Dk. Gaudentia Kabaka kwa kura 308, katika Uchaguzi wa UWT ngazi ya Taifa, uliofanyika wakati wa Mkutano Mkuu wa Jumuiya hiyo, katika Ukumbi wa Mikutano wa Jakaya Kikwete jijini Dodoma, jana.

Akitangaza matokeo aliyekuwa Msimamizi Mkuu wa Uchaguzi huo Waziri Mkuu Mstaafu Mzee Mizengo Pinda alisema katika Jumla ya kura 756 Dk. Gaudentia aliyekuwa akijaribu kutetea kurejea tena kuwa Mwenyekiti wa UWT baada ya kumalizika kipindi chake cha miaka mitano alipata 219 za Wajumbe wa Mkutano huo Mkuu wa Jumuiya hiyo.

Mgombea mwingine aliyetarajiwa kuleta joto kwenye Uchaguzi huo wa UWT ni Mwenyekiti mstaafu wa CCM mkoa wa Dar es Salaam, Mama Kate Slyvia Kamba ambaye aliambulia kura 8, huku wagombea wengine Mariam Lulinda na Dk. Chamshama wakiambulia kura moja moja kila mmoja.

Naibu Katibu Mkuu wa CCM Tanzania Bara Christina Mndeme akimpongeza Mwenyekiti Mpya wa UWT Mary Chatanda (kulia)

Msimamizi wa Uchaguzi wa jana wa UWT Waziri Mkuu Mstaafu Mizengo Pinda akimpongeza Mary Chatanda. (Picha zote na Richard Mwaikenda wa CCM Blog)