RAIS SAMIA AKUTANA NA KUZUNGUMZA NA KATIBU MKUU WA UMOJA WA MATAIFA JIJINI NEW YORK MAREKANI

New York, Marekani
Rais Samia Suluhu Hassan amekutanana Katibu Mkuu wa Umoja wa Mataifa (UN) Antonio Guterres na kujadiliana naye masuala mbalimbali ikiwemo Ulinzi na Usalama Barani Afrika, athari za UVIKO 19 kiuchumi na kijamii pamoja na utekelezaji wa Malengo ya Maendeleo Endelevu (SDGs).

Rais Samia ambaye amekutana na Katibu Mkuu huyo wa UN baada ya kulihutubia Baraza Kuu la Umoja wa Mataifa UN, mjini New York Marekani, jana Septemba 23, 2021, amempongeza kwa kuchaguliwa kwa mara ya pili kuwa Katibu Mkuu wa Umoja wa Mataifa na kumteua tena Amina J. Mohamed kuwa Naibu Katibu Mkuu wa Umoja huo.

Mapema, akilihutubia, Rais Samia, amelihakikishia Baraza Kuu hilo la Umoja wa mataifa (UN) kuwa katika uongozi wake, Tanzania itaendelea kuwa mstari wa mbele katika kushirikiana na mataifa na wadau wengine Duniani kutatua changamoto zinazoukabili ulimwengu hivi sasa.

Ameeleza katika hotuba hiyo kuwa ugonjwa wa Virusi vya Korona, (UVIKO 19) bado unaendelea kupunguza kasi ya kufanikisha Malengo ya Maendeleo Endelevu (SDGs) katika muda uliopangwa na kwamba kwenye baadhi ya nyanja, taarifa zinaonesha kuwa kumekuwa na athari zilizorudisha nyuma mafanikio yaliyokwishapatikana.

Rais Samia ametolea mfano kuwa takriban watu milioni 71duniani wanatarajiwa kurejea katika umasikini  licha ya kwamba walikwishaondokana na hali hiyo na kusisitiza kuwa iko haja ya kuunganisha juhudi za kubadili hali hiyo hasa kwa kuwa changamoto za janga hilo hazijali hali ya nchi ilivyo.

Aidha, Rais Samia amezishukuru Taasisi za Kimataifa ikiwemo Shirika la Fedha Duniani (IMF) kwa jitihada zao za kusaidia nchi zinazoendelea ikiwemo Tanzania zisiathirike zaidi kiuchumi.

Vilevile, ameeleza kuwa tangu kuanza kwa UVIKO 19, Tanzania imekuwa ikichukua jitihada mbalimbali kukabiliana nao ambapo mwezi Julai, 2021 alizindua rasmi programu ya chanjo nchi nzima na kutoa wito kuwa ili watu wengi katika nchi zinazoendelea waweze kupata chanjo, ni vyema hakimiliki ya kuzalisha chanjo hizo itolewa ili uzalishaji ufanyike kwenye nchi nyingi.

Rais Samia ametumia hotuba hiyo pia kueleza juhudi za Serikali ya Tanzania katika kukuza uchumi licha ya changamoto za ugonjwa huo na kwamba baada ya kushuka kwa ukuaji uchumi kutoka asilimia 6.9 hadi asilimia 5.4 hivi sasa Tanzania inafanya jitihada za kuziinua sekta zilizoathirika zaidi na ugonjwa huo, hususan utalii, na pia kuimarisha mazingira ya kufanya biashara ili kuvutia uwekezaji nchinipamoja na kuimarisha misingi ya utawala bora.

Halikadhalika, Rais Samia ameeleza jitihada za Serikali ya Tanzania katika kuongeza ushiriki wa wanawake katika nyanja za uchumi ikiwa ni pamoja na kuweka sera madhubuti na maboresho ya mfumo wa bajeti ili kupunguza idadi ya wanawake na wasichana wanaoishi katika umasikini.

Rais Samia amezungumzia pia athari za mabadiliko ya Tabia Nchi na umuhimu wa kuchukua hatua za kukabiliana na janga hilo na kuyasisitiza mataifa yaliyoendelea kutimiza ahadi zao za kutoa Dola za Kimarekani bilioni 100 kwa mwaka ifikapo mwaka 2025 kama ilivyokubaliwa katika Azimio la Paris.

Wakati huo huo, Rais Samia amekutana na kufanya mazungumzo na Mtendaji Mkuuwa Kampuni ya Grumeti Mikael Andrea anayemwakilisha mmiliki wa kapuni hizo Paul Tudor Jones II ambapo amempongeza Rais kwa kuweka mazingira bora ya biashara na uwekezaji nchini Tanzania.

Mikael Andrea amesema kutokana na kuboreshwa kwa mazingira ya biashara na uwekezaji nchini Tanzania, makampuni yao yataendelea kufanya kazi na Serikali ya Tanzania kwa kuongeza uwekezaji katika sekta ya utalii.

Kwa upande wake Rais Samia amewashukuru Wawekezaji hao kwa uamuzi wao wa kuendelea kuwekeza kwenye sekta ya utalii nchini Tanzania.

Rais wa Jamhuri ya Muungano wa Tanzania Samia Suluhu Hassan, akiwa na Katibu Mkuu wa Umoja wa Mataifa (UN) Antonio Guterres katika Ofisi za Umoja huo, Jijini New York, Marekani jana, Septemba 23, 2021. (Picha na Ikulu)