WAZIRI MKUU MAJALIWA ATAKA MIFUKO YA UWEZESHAJI IBORESHE MASHARTI YA UTOAJI MIKOPO

Waziri Mkuu, Kassim Majaliwa akizungumza wakati alipofungua Maonesho ya Nne ya Mifuko na Programu za Uwezeshaji  Wananchi  kwenye Uwanja wa Sheikh Amri Abei jijini Arusha, leo Februari 9, 2021. Picha zaidi chini ya habari.

Na Mwandishi Maalum, Arusha

WAZIRI MKUU Kassim Majaliwa leo Jumanne, Februari 9, 2021  amefungua Maonesho ya Nne ya Mifuko na Programu za Uwezeshaji Wananchi yanayoendelea katika Viwanja vya Shiekh Amri Abied jijini Arusha. 

Katika ufunguzi huo, Waziri Mkuu Kassim Majaliwa ameiagiza mifuko na programu zote za uwezeshaji zifanye tathmini ya shughuli na huduma zake ili kubaini mafanikio, changamoto na maeneo yanayohitaji uboreshaji hususan eneo la masharti ya utoaji mikopo kwa wajasiriamali.

Pia, Waziri Mkuu ameitaka mifuko inayotoa dhamana kwa wafanyabiashara na wajasiriamali mbalimbali nchini, iimarishe usimamizi, uratibu na utendaji wake kwa kutengeneza mipango maalum ya kila mwaka inayoonesha malengo ya dhamana zitakazotolewa katika mwaka husika.

 

Amesema mipango maalumu itakayoandaliwa na mifuko inayotoa dhamana kwa wafanyabiashara na wajasiriamali inatakiwa iwasilishwe Ofisi ya Waziri Mkuu kupitia Baraza la Taifa la Uwezeshaji Wananchi Kiuchumi na baadaye taarifa za utekelezaji zitolewe katika kipindi cha kila robo mwaka.

 

“Wasimamizi na Watendaji wa mifuko na programu pamoja na walengwa jiepusheni na vitendo vya rushwa kwani rushwa ni adui wa haki na ni kikwazo kikubwa cha maendeleo. Pia, watendaji wa mifuko na programu za uwezeshaji pamoja na taasisi za fedha hakikisheni mnatoa huduma bila urasimu wala ubaguzi wa aina yoyote. Nasisitiza wananchi wanapofika kwenye ofisi zenu wapokelewe kwa staha, wasikilizwe na kupatiwa huduma stahiki kwa wepesi.”

 

Aidha, Waziri Mkuu Kassim Majaliwa  amezitaka Halmashauri nchini zihakikishe zinatenga asilimia 10 ya mapato yake ya fedha za ndani ili zitumike kutoa mikopo kwa vijana (asilimia 4), wanawake (asilimia 4) na watu wenye ulemavu (asilimia 2). Pia, ametoa wito kwa Mabaraza ya Madiwani katika kila Halmashauri kufuatilia utekelezaji wa maagizo haya ya Serikali ambayo yameridhiwa na Bunge na kutungiwa sheria mahsusi.

Waziri Mkuu, Kassim Majaliwa akitazama glass zilizotengenezwa na Ameniba Mberwa (kulia) wakati alipotembelea Manonesho ya Nne ya Mifuko na Programu za Uwezeshaji Wananchi katika Uwanja wa Sheikh Amri Abeid jijini Arusha, leo. Ameniba  amewezeshwa na Mfuko wa Maendeleo ya Jamii unaoratibiwa na  Wizara ya Afya, Maendeleo ya Jamii, Jinsia, Wazee na Watoto.

Waziri Mkuu, Kassim Majaliwa akipata maelezo kuhusu bidhaa mbalimbali wakati alipotembelea Banda la Fabiola Panga kutoka wilayani Hanang Mkoa wa Manyara (kulia) katika Maonesho ya Nne ya  Mifuko na Programu za Uwezeshaji Wananchi  yaliyofanyika  kwenye  Uwanja wa Sheikh Amri Abeid jijini Arusha, leo. Wa Pili kushoto ni Katibu Mtendaji wa Baraza la Uwezeshaji Wananchi Kiuchumi, Beng’i Issa.

Waziri Mkuu, Kassim Majaliwa  akitazama sabuni na bidhaa mbalimbali  za usafi majumbani wakati alipotembelea banda la Joyce Mizambwa (kushoto) katika Maonesho   ya Nne ya Mifuko na Programu za Uwezeshaji Wananchi  kwenye uwanja wa Sheikh Amri Abeid jijini Arusha, leo. Wa pili kulia ni Mkuu wa Mkoa wa Kilimanjaro, Anna Mgwira.

Waziri Mkuu, Kassim Majaliwa akipata maelezo kuhusu bidhaa mbalimbali  alipotembelea banda la Jonia Kalumuna   katika Maonesho ya Nne ya  Mifuko na Programu za Uwezeshaji Wananchi  kwenye uwanja wa Sheikh Amri Abeid jijini Arusha, leo. Wa pili kushoto ni Katibu Mtendaji wa Baraza la Uwezeshaji  Wananchi Kiuchumi, Beng’i Issa.

Waziri Mkuu, Kassim Majaliwa akitazama mazuria yaliyofumwa kwa kutumia nyuzi za pamba alipotembelea banda la Lucas Saguda   katika Maonesho ya Nne ya  Mifuko na Programu za Uwezeshaji Wananchi  kwenye uwanja wa Sheikh Amri Abeid jijini Arusha, leo (Picha zote na Ofisi ya Waziri Mkuu).