MFUMUKO WA BEI WA TAIFA JANUARI-DESEMBA 2020 WAPUNGUA

Kaimu Mkurugenzi wa Sensa za Watu na Takwimu za Jamii, Ruth Minja akizungumza katika mkutano na waandishi wa habari jijini Dodoma jana, kuhuru taarifa ya wastani wa mfumuko wa bei wa Taifa kutoka Januari hadi Desemba 2020. PICHA ZOTE NA RICHARD MWAIKENDA

Minja akifafanua jambo alipokuwa akijibu maswali ya wanahabari.

 Makao Makuu ya Ofisi ya Taifa ya Takwimu (NBS), iliyopo Barabara ya Jakaya Kikwete, jijini Dodoma.

Na Richard Mwaikenda, Dodoma.

WASTANI wa Mfumuko wa Bei wa Taifa kutoka mwezi Januari hadi Desemba, 2020 umepungua hadi asilimia 3.3 mwaka 2020 kutoka asilimia 3.4 mwaka 2019.

 Wastani wa Mfumuko wa Bei wa bidhaa za vyakula umeongezeka hadi asilimia 5.0 mwaka 2020 kutoka asilimia 4.3 mwaka 2019. Kwa upande mwingine, wastani wa Mfumuko wa Bei wa bidhaa zisizo za vyakula kwa mwaka 2020 umepungua hadi asilimia 2.8 kutoka asilimia 4.0 mwaka 2019.

 

Takwimu hizo zimetolewa na Mtakwimu Mkuu wa Ofisi ya Taifa ya Takwimu (NBS), Mkurugenzi wa Sensa za Watu na Takwimu za Jamii, Ruth Minja alipokuwa akizungumza na vyombo vya habari Makao Makuu ya NBS, jijini Dodoma leo.

Minja amesema kuwa wastani wa Mfumuko wa Bei ambao haujumuishi vyakula na nishati umepungua hadi asilimia 2.3 mwaka 2020 kutoka asilimia 3.0 mwaka 2019.

 

“Mfumuko wa Bei wa Taifa kwa kipimo cha mwaka unapima kiwango cha kasi ya mabadiliko ya bei za bidhaa na huduma zote zinazotumiwa na kaya binafsi,”amefafanua.

Aidha, Minja amesema mfumuko wa Bei wa Taifa kwa mwaka ulioishia mwezi Desemba, 2020 umeongezeka hadi asilimia 3.2 kutoka asilimia 3.0 kwa mwaka ulioishia mwezi Novemba, 2020.

“Hii inamaanisha kuwa, kasi ya mabadiliko ya bei za bidhaa na huduma kwa mwaka ulioishia mwezi Desemba, 2020 imeongezeka kidogo ikilinganishwa na kasi iliyokuwepo kwa mwaka ulioishia mwezi Novemba, 2020. Fahirisi za Bei zimeongezeka hadi 120.79 mwezi Desemba, 2020 kutoka 117.10 mwezi Desemba, 2019,”amesema Minja.

Akiangazia upande wa nchi za Afrika Mashariki, alibainisha kuwa nchini Kenya mfumuko wa bei kwa mwaka ulioishia  Desemba, 2020 umeongezeka hadi asilimia  5.62 kutoka asilimia 5.33 kwa mwaka ulioishia  Novemba 2020. Kwa upande wa Uganda, mfumuko wa bei kwa mwaka ulioishia  Desemba , 2020 umepungua hadi asilimia 3.6 kutoka asilimia 3.7 kwa mwaka ulioishia  Novemba,2020.