KILIMANJARO YAFUNGUA KITUO CHA KUUZA MADINI

Serikali Mkoani Kilimanjaro imefungua kituo cha kuuza madini ili kudhibiti utoroshaji wa madini yaliyogundulika katika Wilaya za Same, Mwanga, Rombo na Siha.

Mkuu wa Mkoa wa Kilimanjaro, Anna Mghwira, aliyasema hayo, alipokuwa akizungumza mjini hapo.

“Serikali imeanzisha kituo cha kuuzia madini katika Wilaya ya Same, ambayo inaongoza kuwa na madini mengi zaidi na kuanzishwa kwa kituo hicho, kutaisaidia Serikali kukusanya mapato sahihi yatokanayo na madini pamoja na kudhibiti utoroshaji wa madini.

“Serikali kupitia wataalamu kutoka ofisi ya madini, wamebaini uwepo wa madini mengi katika Wilaya za Same, Mwanga, Rombo na Siha.

“Kwa kuwa kumekuwa na tabia ya baadhi ya wachimbaji na wafanyabiashara wa madini kutorosha madini, kuanzishwa kwa kituo hicho katika wilaya hiyo kutasaidia kudhibiti utoroshaji wa madini katika wilaya hizo.

“Pamoja na hayo, katika tafiti zilizofanywa na timu ya wataalamu karibu wilaya zetu zote zina madini, hivyo mkoa umeona umuhimu wa kuanzisha kituo ndani ya Wilaya ya Same kwanza kutokana na kuongoza kuwa na aina nyingi za madini,” alisema Mghwira.

Kwa mujibu wa Mghwira, lengo la Serikali kuanzisha vituo hivyo vya kuuzia madini ni kutaka kujua uzalishaji wa madini katika eneo husika na kuwatambua wachimbaji wenye leseni na wasio na leseni.