AG: TUTATUMIA UZOEFU WA WASTAAFU WETU

 Mwanasheria Mkuu wa Serikali Profesa Adelardus Kilangi akimkabidhi zawadi ya kitabu  Mwandishi Mkuu wa Sheria Sarah Kinyamfula Barahomoka katika hafla ya kuwapongeza na kuwaaga watumishi Saba wa Ofisi ya Mwanasheria Mkuu wa Serikali ambao wamestaafu na wanastaafu Utumishi wa Umma. Sarah Barahomoka ambaye anastaafu rasmi mwezi Julai Mwaka huu ni Mwanamke wa Kwanza kuwa Mwandishi Mkuu wa Sheria ( Chief Parliamentary Draftsman) amekuwa katika utumishi wa umma kwa miaka 33.
-------
Na Mwandishi Maalum, Dodoma
Mwanasheria Mkuu wa Serikali, Profesa Adelardus  Kilangi amesema, Ofisi yake itaandaa utaratibu wa kuwatumia watumishi wake waliostaafu  katika maeneo mbalimbali yakimamo ya kufundisha na ushauri.

Ameyasema hayo mwishoni mwa wiki, wakati wa hafla ya kuwapongeza na kuwaaga watumishi saba  ambao wamestaafu  na wanastaafu  utumishi wa  umma kwa mujibu wa sheria. 

Hafla hiyo  na ambayo pia ilihudhuriwa na Naibu Mwanasheria Mkuu wa Serikali Dk. Evaristo Longopa ilifanyika  katika ukumbi wa Veta Jijini  Dodoma

Miongoni  mwa watumishi hao wanaostaafu ni pamoja na  Mwandishi Mkuu wa Sheria Bibi Sarah Kinyamfula Barahomoka , Mwanamke wa Kwanza kuwa Mwandishi Mkuu wa Sheria tangu  Tanzania ipate uhuru na amekuwa katika utumishi wa umma kwa miaka 33 akiwa kaka miaka yote hiyo yote amefanya kazi katika Ofisi ya Mwanasheria Mkuu wa Serikali.

“Watumishi wenzangu mnaostaafu.  Mnastaafu  bado mkiwa na  akili timamu na afya njema, mnastaafu utumishi wa Umma kwa Heshima kubwa hongereni sana.

Uzoefu mnaoondoka nao hamkuupata kwa mwaka mmoja au mwili, ni uzoefu ambao umejijengea katika kipindi chote cha utumishi wetu” akasema Mwanasheria Mkuu .

Na kuongeza “ Ofisi yangu  tutaandaa utaratibu wa kuangaliana namna ya kuutumia uzoefu wenu huu, iwe kwa kutoa ushauri au kwa kuja kufundisha.  

Na kwa hiyo msishangae mkiona hata katika ustaafu wenu tunawaomba mje mtusaidie katika  kutuongezea nguvu katika maeneo fulanifulani mkiwa kama washauri au wakufunzi.Na ninaomba sana tutakapowaomba na kuwahitaji mtukubalie” akasisitiza na  kushangiliwa na watumishi.

Profesa Kilangi amewataka wastaafu hao  kwenda na kuutumia uzoefu wao waliojijengea katika utumishi wa umma kwa maendeleo na manufaa yao  wenyewe na familia zao  lakini pia  kwa manufaa na maslani pamana ya   Serikali na  Nchi kwa Ujumla.

Kuhusu watumishi wate wa Ofisi ya Mwanasheria Mkuu wa Serikali, Profesa Kilangi amewashukuru  na kuwapongeza kwa namna ambavyo wameupokea na kuanza kuutekeleza Muundo Mpya wa Ofisi ya Mwanasheria Mkuu wa Serikali kufuatia  mabadiliko yaliyofanya na Mhe Rais John Magufuli mwaka  jana. 

“Niwashukuruni sana kwa namna  mnavyotekeleza majukumu yenu, wengi wetu tumeyapokea vema mabadiliko ya  Muundo wa Ofisi  aliyoyafanya Rais mwaka jana na  mmeelewa lengo  na nia yake ambayo ni kuboresha huduma zinazotolewa na Ofis ya  Mwanasheria Mkuu  wa Serikali na nipende kusema mbele yenu kwamba sasa ukizungumza na wadau wetu wengi huko nje wanafurahi sana, wanaridhika  sana na huduma zinazotolewa na  Ofisi ya Mwanasheria Mkuu wa Serikali” akasema .

Pamoja na pongezi hizo, amewataka watumishi wote wa Ofisi  yake ni vema wakafahamu  ulimwengu wa sasa unahitani watu au  watumishi wasomi  na wenye uwezo wa juu wa kuelewa mambo na kutatua matatizo na katika muktadha huo ametoa wito wa watumishi wote  kila mmoja kwa mujibu wa kada yake kujiendeleza ili Ofisi ya Mwanasheria  Mkuu  wa Serikali ikawe kioo na kielelezo   bora katika  Taifa letu.

“Natoa wito  mjiendeleze kwa  kulingana na  kada zanu mwenye  certificate basi apate  diploma, mwenye diploma apate degree ya kwanza na mwenye degree ya kwanza apate ya pili na  na mwenye ya pili alenge kupata udaktari na hatimaye uprofesa hakuta kuwa na shinda kama ofisi hii itajaa  madokta” akasisitiza  kwa mkazo.

Pia amewataka watumishi wote kujiandaa  kifikra kwa mapokeo  ya matumizi ya tehama katika utekelezaji wa majukumu yao ya kila siku pamoja na kutumia vema muda wa kazi  na kutumia vema raslimali na vitendea kazi vilivyovopo  ili kutekeleza vema  na kwa tija kauli mbiu ya ‘hapa Kazi tu’ 

Aidha amesema anaridhiswa na kufurahishwa na  idadi  kubwa ya watumishi  wanawake ambao wameshika nafasi  na  Wakurugenzi, Wakurugenzi Wasaidizi na Wakuu wa Vitengo utaratibu ambao amesema ameukuta  hataka kabla yake.

Akitoa salamu za Shukrani kwa niaba ya wastaafu wenzie Mwandishi Mkuu wa Sheria  Bibi Saraha Barahamoka amemshukuru  Mwanasheria Mkuu wa Serikali  kwa kuwaandalia hafla ya kuwapongeza na kuwaaga ikiwa ni pamoja na kuwapatia vyeti vya utumishi.

Akasema yeye binafsi na wenzake wamefurahishwa sana na namna Ofisi ilivyotambua na kuthamini mchango wa utumishi wao katika Ofisi ya Mwanasheria Mkuu wa Serikali, Serikali  na Nchi kwa Ujumla.

Aidha akasema,  katika kipindi chote cha utumishi wao katika Ofisi ya Mwanasheria Mkuu wa Serikali wamepata ushirikiano mzuri kutoka kwa  viongozi wa juu na watumishi wenzao  na kwamba wanaomba ushirikiano na moyo huo wa kusaidiana  unaendelezwa  baina ya viongozi wa  wajuu na watumishi wote.

Watumishi wengine waliostaafu  ni  Bibi Ester James Manyesha  ambaye  ni Mkurugenzi  Msaidizi Uandishi wa Sheria na  amekuwa katika utumishi wa umma kwa miaka 35, Bibi Grace Mlondezi Mfinaga, Mwandishi wa  Sheria Mkuu Daraja la  kwanza na  amekuwa katika utumishi wa umma kwa Miaka 36 na Bw. Hussein Shabani  Kaweto Msaidizi Kumbukumbu Daraja la kwanza  ambaye amedumu katika utumishi wa Umma kwa Miaka 37.

Wengine ni  Benadetha Cosman Karadisy  ambaye ni Msaidizi wa Mtendaji Mkuu  Daraja la Pili na amedumu katika utumishi wa Umma kwa miaka 36, Cosmasi Bayi Machupa  ambaye ni Dereva daraja la  Kwanza yeye amedumu katika utumishi wa Umma wa  miaka 16 na Mary Mahigu Maganga ambaye ni  Msaidizi wa Ofisi Mkuu yeye amedumu katika utumishi wa Umma  kwa miaka 30

Watumishi wa Ofisi ya  Mwanasheria Mkuu wa Serikali ambao wanastaafu utumishi wa Umma wakiwa katika picha ya pamoja wakati wa hafla ya kuwapongeza na kuwaaga iliyoanyika mwisho mwa wiki. miongoni mwa zawadi walizopewa ni pamoja na Kitabu'Retiring Gloriuosly'. Kutoka kushoto   na  miaka yao ya utumishi kwenye mabano ni Bw. Hussein  Shabani Kaweto (37), Bibi Esther  James Manyesha (35), Bibi Sarah Kinyamfula Barahomoka (33), Mwanasheria Mkuu wa Serikali Profesa Adelardus Kilangi, Naibu Mwanasheria Mkuu wa Serikali  Dk. Evaristo Longopa, Bibi Mary Mahingu Maganga(30), Bibi Benadetha Cosmas Karadisy (36) na Bw. Cosmasi Bayi Machupa (16)