RAIS SAMIA NI MWENYE MAONO, UTASHI WA DHATI NA UWEZO

Mheshimiwa Rais Dkt. Samia Suluhu Hassan ameendelea kuthibitisha kuwa kiongozi mwenye maono, utashi wa dhati na uwezo wa kutekeleza maendeleo ya nchi kwa vitendo. Ziara yake ya hivi karibuni mkoani Tanga ilidhihirisha dhamira yake ya dhati katika kuboresha sekta mbalimbali zinazogusa maisha ya Watanzania moja kwa moja. Kupitia uongozi wake mahiri, miradi mikubwa ya maendeleo imezinduliwa, changamoto za wananchi zimesikilizwa, na mipango madhubuti ya kuinua uchumi imewekwa.

Kuimarisha Miundombinu na Uchumi wa Mkoa wa Tanga

Katika ziara yake, Mheshimiwa Rais Samia alitangaza hatua kubwa za kufufua Bandari ya Tanga, lengo likiwa ni kuongeza uwezo wa kuhudumia shehena kubwa zaidi na kupanua fursa za ajira kwa vijana. "Tumeongeza uwezo wa Bandari ya Tanga kutoka tani laki nne hadi tani 1,200,000. Hii ina maana kwamba tunafungua milango kwa ajira nyingi zaidi kwa vijana wa Tanzania," alisema Mheshimiwa Rais Samia wakati wa mkutano wake na wananchi.

Uboreshaji huu wa bandari utasaidia kuongeza biashara ya kimataifa, kuwezesha usafirishaji wa bidhaa kwa haraka, na kuifanya Tanga kuwa kitovu cha kiuchumi nchini. Aidha, mpango wa kuifanya bandari hiyo kuwa maalum kwa usafirishaji wa mbolea na mazao ya kilimo ni ishara kwamba serikali inazingatia sekta ya kilimo kama msingi wa uchumi wa nchi.

Ajira kwa Vijana na Maendeleo ya Kilimo

Katika juhudi za kuinua uchumi wa wananchi, Mheshimiwa Rais alizungumzia mradi wa Jenga Kesho Ilio Bora (BBT), unaolenga kuwawezesha vijana kushiriki katika kilimo biashara kwa kupewa ardhi, pembejeo na mafunzo ya kisasa. "Vijana ndio nguvu kazi yetu, na tumeamua kuwawezesha kupitia sekta ya kilimo ili kuongeza uzalishaji na kipato kwao," alisema Mheshimiwa Rais Samia.

Pia, alizungumzia kuhusu miradi mikubwa ya umwagiliaji, kama vile mradi wa Mkomazi, ambao utaongeza tija kwa wakulima na kupunguza utegemezi wa kilimo cha mvua. Kupitia sera madhubuti za biashara na uwekezaji, serikali yake imeendelea kuvutia wawekezaji wakubwa wanaokuja kuwekeza katika sekta ya kilimo na viwanda.

Umuhimu wa Nishati Safi na Utunzaji wa Mazingira

Katika Wilaya ya Muheza, Rais Samia alizindua mpango wa kugawa mitungi ya gesi kwa wananchi ili kuwahamasisha kutumia nishati safi na kupunguza matumizi ya mkaa na kuni. "Tunapaswa kulinda mazingira yetu kwa kuhakikisha tunatumia nishati mbadala," alisema Mhe. Rais Samia wakati wa hafla ya uzinduzi wa mradi huo. Hatua hii ilionekana kuwa ya kimkakati katika juhudi za kulinda mazingira na kupunguza uharibifu wa misitu nchini.

Katika mkutano huo, Naibu Waziri wa Nishati, Mhe. Judith Kapinga, alisisitiza umuhimu wa mpango huu kwa kusema, "Huu ni mwanzo wa mageuzi makubwa katika matumizi ya nishati safi nchini, na serikali ina dhamira ya kuhakikisha wananchi wanapata gesi kwa bei nafuu."

Mageuzi Makubwa katika Sekta ya Mawasiliano

Mheshimiwa Rais Samia pia alitangaza mradi wa ujenzi wa minara 758 ya mawasiliano wenye thamani ya shilingi bilioni 126, lengo likiwa ni kuhakikisha kuwa wananchi wa maeneo ya vijijini wanapata huduma bora za mawasiliano. "Tumebaini kuwa kuna changamoto ya usikivu wa redio na mawasiliano katika baadhi ya maeneo ya Tanga, tumeanza mradi mkubwa wa kuongeza minara ili kila mwananchi apate huduma hizi muhimu," alieleza Mheshimiwa Rais Samia.

Mradi huu utawezesha wananchi kupata taarifa kwa wakati, kuboresha huduma za biashara mtandaoni, na kusaidia sekta ya elimu kwa kuwezesha wanafunzi kupata rasilimali za masomo kupitia teknolojia ya kidijitali.

Uwekezaji Kwenye Utamaduni na Sanaa

Katika kuendeleza sekta ya sanaa na utamaduni, serikali imefanikiwa kutoa mikopo yenye thamani ya shilingi bilioni 5.25 kwa miradi 359 ya sanaa, ambayo imezalisha ajira 497,213. Falsafa ya 4R ya Mheshimiwa Rais Samia—Ustahimilivu, Maridhiano, Mageuzi, na Ujenzi Mpya—imekuwa chachu ya mabadiliko makubwa kwenye sekta hii. "Tunataka kuona sekta ya sanaa na utamaduni inakuwa ajira rasmi kwa vijana wetu," alisema Mheshimiwa Rais Samia, akihimiza vijana kuchangamkia fursa hizi.

Ziara ya Mheshimiwa Rais Dkt. Samia Suluhu Hassan mkoani Tanga ilikuwa na mafanikio makubwa, ikiakisi dhamira yake ya kuleta maendeleo kwa vitendo. Kutoka kwenye uboreshaji wa bandari, uwekezaji katika kilimo, mageuzi ya sekta ya mawasiliano, hadi uwezeshaji wa vijana kupitia sanaa, Mheshimiwa Rais Samia ameendelea kuonesha kuwa ni kiongozi wa mabadiliko chanya. Hakika, Tanzania inazidi kupiga hatua chini ya uongozi wake shupavu na wenye maono makubwa.

Imeandaliwa na:-

CPA Maro, Maro D