DKT. NCHIMBI KUFANYA ZIARA ETHIOPIA

Katibu Mkuu wa Chama Cha Mapinduzi (CCM), Balozi Dkt. Emmanuel Nchimbi, ataongoza ujumbe wa CCM katika ziara ya kikazi nchini Ethiopia kuanzia tarehe 29 hadi 31 Januari 2025, kufuatia mwaliko wa Chama Tawala cha Ethiopia, Prosperity Party.

Ziara hiyo itajumuisha ushiriki wa Balozi Nchimbi katika Mkutano Mkuu wa Pili wa Prosperity Party, pamoja na juhudi za kuimarisha uhusiano kati ya Ethiopia na Tanzania kupitia vyama hivyo viwili vinavyoongoza Serikali katika nchi hizo.

Vilevile, ziara hiyo inalenga kuimarisha ushirikiano wa diplomasia ya uchumi kati ya Ethiopia na Tanzania, uhusiano ambao ulijengwa miaka mingi iliyopita kwa misingi imara ya kisiasa wakati wa harakati za ukombozi wa Afrika.

Mazungumzo kati ya Balozi Nchimbi na viongozi waandamizi wa Prosperity Party yataangazia mikakati ya maendeleo yenye manufaa kwa pande zote, hususan katika sekta za uwekezaji, biashara, ufugaji na teknolojia.

Balozi Nchimbi anatarajiwa kurejea nchini tarehe 1 Februari 2025.