DK NCHIMBI AMTAMBULISHA TIBAIGANA MULEBA

Katibu Mkuu wa Chama Cha Mapinduzi (CCM), akisalimiana kwa furaha na aliyewahi kuwa Kamanda wa Polisi Kanda Maalumu ya Dar es Salaam, Kamishna mstaafu, Alfred Tibaigana alipomtambulisha wakati wa mkutano wa hadhara Muleba Mjini ambako ndiyo nyumbani kwao Tibaigana.

Dk. Nchimbi amehitimisha ziara ya siku 6 katika Mkoa wa Kagera kwa kufanya mkutano wake wa mwisho Muleba Mjini leo Agosti 11, 2024.

Baada ya kumaliza ziara hiyo katika mkoa huo anaendelea na ziara katika Mkoa wa Geita na baadaye mikoa mingine ya Mwanza na Mara. Katika siku za hivi karibuni tayari kafanya ziara katika mikoa ya Lindi, Mtwara na Kigoma.

Malengo ya ziara hiyo ni; Kukagua utekelezaji wa Ilani ya Uchaguzi ya CCM ya mwaka 2020-2025, kuhuisha uhai wa chama, kusikiliza na kutatua kero za wananchi pamoja na kuhamasisha wananchi kujitokeza kuhakiki taarifa zao na kujiandikisha katika Kitabu cha Kudumu cha Wapiga kura, kwa ajili ya maandalizi ya Uchaguzi wa serikali za mitaa Novemba mwaka huu.

Balozi Dk. Nchimbi, kwenye hiyo ziara ameambatana na Katibu wa Halmashauri Kuu ya CCM Taifa (NEC) - Oganaizesheni, Issa Haji Usi Gavu, Katibu wa NEC - Itikadi, Uenezi na Mafunzo, Amos Makalla, Katibu wa NEC - Siasa na Uhusiano wa Kimataifa, Rabia Abdallah Hamid.