DK. MWIGULU: ENDELEENI KUMSHUKURU NA KUMUUNGA MKONO RAIS DK. SAMIA

Na Hemedi Munga, Iramba
Waziri wa Fedha, Dk. Mwigulu Nchemba amewaomba wananchi kuendelea kumshukuru na kumuunga mkono Rais Dk. Samia Suluhu Hassan, kwa sababu anaendelea kufanya makubwa yanayoboresha ustawi na kujali afya zao.

Akizungumza na wananchi wa Kata ya Urughu, wilayani Iramba mkoani Singida. Dk. Nchemba amesema rais samia anagusa maisha ya mtu mmoja mmoja nchini.

Ameweka wazi kuwa fedha zinazokuja Iramba na maeneo yote ya nchi zinakwenda ikiwemo kujenga vituo vya afya katika kila tarafa na maeneo muhimu nchini.

"Tuendelee kumuunga mkono Rais wetu, anafanya mambo makubwa, fedha alizozitoa haziishii kwenye makaratasi ni vituo vya afya vinavyoonekana kwa macho kote nchini, mtu anaejali afya yako amekutakia mema sana kwa sababu bila ya afya huwezi kufanya kazi," amebainisha. .

Aidha, ameeleza kuwa  mtu anaejali afya yako anakupa mtaji wa kufanya kazi kwa sababu mtu anaweza kuwa na mipango mizuri ya kazi lakini asipokua na afya njema hawezi kuitekeleza mipango hiyo.

Aliongeza kuwa hatua hiyo, ndio tafsiri halisi  ya Rais Dk Samia kuwapenda watanzania maana vituo hivi mnavyoviona hapa vipo nchi nzima.

"Ndugu zangu ninawathibitisha kuwa nchi nzima katika kila makao makuu ya tarafa na eneo la kimkakati lisilokua tarafa kuna kituo cha afya chenye hadhi ya hospitali ya wilaya," amesisitiza na kuongeza kuwa.

"Mama ametafasiri kwa vitendo kauli ya kuwapenda Watanzania na anashughulikia tatizo la ugumu wa maisha kwa kupeleka miradi mikubwa ya umwagiliaji hata ngazi ya kijiji ambayo inatoa majawabu."

Amesema anaorodha ya matatizo na kutoa majawabu kivitendo  kwa sababu nchi nzima kuna miradi ya umwagiliaji na miradi ya kufungua barabara ambapo itabadilisha maisha ya watanzania kutoka kwenye ugumu.

Kwa upande wa Mkuu wa wilaya hiyo, Suleiman Mwenda amedokeza kuwa  Rais Dk. Samia Suluhu Hassan alihakikisha usalama wa chakula na kilimo kwa kuagiza yachaguliwe maeneo kwa lengo la kupanua na kuanzisha kilimo cha umwagiliaji.

Amesema hatua hiyo, itawafanya wananchi waweze kulima wakati wote wa  kiangazi na masika kwa sababu  watakua wanauwezo wa kuhifadhi maji.

"Tunao mradi wa Masimba katika sehemu ya Bonde la Wembere ambapo tumeishaletewa zaidi ya  sh bilioni 3  na kutenga hekari 36,000 ambazo zitaendelezwa kwa shughuli za kilimo cha  umwagiliaji," amesema DC Mwenda.

Aidha, amethibitisha kuwa tayari wataalam, maofisa wa umwagiliaji watatu wameishafika kujitambulisha ofisini kwake  ambao wanashirikiana na wenyeji na kazi tayari imeanza.

Waziri wa Fedha, Dk. Mwigulu Nchemba akiwaeleza wananchi namna Rais Dk. Samia Suluhu Hassan anavyogusa maisha ya mtu mmoja mmoja hadi katika ngazi ya kijiji, leo katika kata ya Urughu wilayani Iramba mkoani Singida.

Mkuu wa wilaya ya Iramba Mkoani Singida, Suleiman Mwenda akithibitisha kupokea takribani sh bilioni 3 katika mradi wa umwagiliaji kijiji cha Masimba  kata ya Urughu, leo  wakati akiongea na wananchi hao.(Picha zote na Hemedi Munga).