NI KINANA NA MSUGURI

Na Jacqueline Liana, Mara
Maadhimisho ya Kumbukumbu ya siku ya Mashujaa Tanzania yaliyofanyika jana, Jumanne Julai 25, 2023, yalipampambwa na matukio mbalimbali ikiwemo shamrashamra zilizofanyika Mjini Dodoma zikiongozwa na Amiri Jeshi Mkuu Rais wa Jamhuri ya Muungano wa Tanzania Dk. Samia Suluhu Hassan.

Wakati shamrashamra hizo zikiendelea Dodoma, mkoani Mara nako lilitokea tukio la sanjari na shamrashamra hizo ambalo lilifanywa na Makamu Mwenyekiti wa Chama Cha Mapinduzi (CCM) Tanzania Bara, Kanali Mstaafu Abdulrahman Kinana.

Kanali mstaafu Kinana katika kuiadhimisha kumbukumbu hiyo ya siku ya Mashujaa Tanzania, aliitembelea familia ya Baba wa Taifa Hayati Mwalimu Julius Nyerere na kumjulia hali Mkuu wa Majeshi Mstaafu Jenerali David Musuguri, Kijijini Mwitongo, Wilaya ya Butiama.

Hakika ulikuwa ni wakati mzuri siyo tu kwa Kanali Mstaafu Kinana, bali pia kwa viongozi wa CCM aliokuwa amefuatana nao, akiwemo Katibu wa Halmashauri Kuu ya Taifa (NEC), Itikadi na Uenezi, Ndg. Sophia Mjema, pale walipokutana na shujaa Jenerali Musuguri.

Baada ya Kanali Mstaafu Kinana kufika nyumbani kwa Jenerali Musuguri ambaye mwaka huu 'amegonga' miaka 103 ya umri, shauku ya kusalimiana ikawa ya mvuto kwa kujawa na bashasha baina ya Kanali Mstaafu Kinana na Jenerali Msuguri;

Jenerali Msuguri: Wewe ni nani?
Makamu Mwenyekiti: Kinana.
Jenerali Musuguri: Aaaa…Kinana, Kinana, Kinana..

Akiwa Kijijini Mwitongo, Kanali Mstaafu Kinana pia alizuru Kaburi la Mwalimu Nyerere na kuweka shada la maua akiungwa mkono na Katibu wa NEC, Itikadi na Uenezi Sophia Mjema ambaye pia aliweka maua kwenye kaburi hilo.

Kinana alifika mkoani Mara akiwa katika ziara ya kukagua utekelezaji wa Ilani na Uhai wa Chama na Jumuia zake katika mkoa huo, ambapo katika ziara hiyo ameambata na viongozi kadhaa wa Chama akiwemo Katibu wa NEC, Itikadi na Uenezi Ndugu Mjema na Mjumbe wa Halmashauri Kuu ya Taifa (NEC) Hamoud Abou Jumaa.

Makamu Mwenyekiti wa Chama Cha Mapinduzi (CCM) Tanzania Bara Abdulrahman Kinana akimsalimia Mkuu wa Majeshi mstaafu Jenerali Mstaafu David Musuguri (103) nyumbani kwake Butiama mkoani Mara jana. Kinana amefika nyumbani kwa Jenerali Musuguri ikiwa ni sehemu ya kumjulia hali na kutambua mchango wa Shujaa huyo.

Makamu Mwenyekiti wa Chama Cha Mapinduzi (CCM) Tanzania Bara Abdulrahman Kinana akiguswa mkono wa baraka na Mkuu wa Majeshi mstaafu Jenerali Mstaafu David Musuguri baada ya kusaliana, nyumbani kwake Butiama mkoani Mara jana. Kinana amefika nyumbani kwa Jenerali Musuguri ikiwa ni sehemu ya kumjulia hali na kutambua mchango wa Shujaa huyo. Kushoto ni Katibu wa NEC, Itikadi na Uenezi Sophia Mjema na Mjumbe wa NEC Hamoud Abou Jumaa.