NAWASHUKURU WCF KWA KUNIWEZESHA KUYAMUDU MAISHA"-MNUFAIKA WA FIDIA

 

NA K-VIS BLOG/KHALFAN SAID, MOROGORO.

MNUFAIKA wa Mfuko wa Fidia kwa Wafanyakazi (WCF) Bw. Deus Anthony, ameushukuru Mfuko huo kwa kumuwezesha kuyamudu maisha licha ya kupata Ulemavu wa Kudumu uliotokana na Kazi.

Mnufaika huyo mkazi wa Morogoro ameyasema hayo jana Aprili 27, 2023 kwenye Maonesho ya Siku ya Kimataifa ya Usalama na Afya mahali pa kazi kwenye viwanja vya Tumbaku mjini humo.

“Nilikatika mguu   wa kushoto wakati nikiwa kazini mwaka 2017, WCF wamekuwa na mimi katika matibabu hadi kupona.”

Alisema hawakuishia hapo, “Nilipata Ulemavu wa Kudumu, wameninunulia mguu wa bandia naweza kutembea vizuri bila ya shida yoyote,” amefafanua.

Bw. Deus ambaye wakati anaumia kazi yake ilikuwa ni udereva amesema pensheni ya kila mwezi anayolipwa na WCF ameweza kudunduliza na kununua bajaji.

“Nawashukuru WCF kwa kuniwezesha kuyamudu maisha, hivi sasa nafikiria kukodi shamba ili nilime maaharage huko Mikumi.” Amesema

Kuhusu ushiriki wa WCF kwenye Maonesho hayo yanayofanyika Kitaifa mjini humo, Mkurugenzi wa Huduma za Tathmini WCF, Dkt. Abdulsalaam Omar amesema  pamoja na kulipa fidia  Mfuko unalo jukumu la kukuza mbinu za kuzuia ajali, magonjwa ama vifo vinavyotokana na kazi lakini pia kutoa elimu kwa Umma;

“Na hapa ndio mahala pake, hapa tunakutana na wananchi, tunakutana na wafanyakazi lakini pia tunakutana na waajiri, hivyo hii ni fursa nzuri kwetu na kwa wadau wetu pia.” Alisema Dkt. Omar.

Alisema katika banda la WCF wanatoa Elimu ya Fidia kwa njia mbalimbali ikiwemo michoro inayoonyesha tofauti ya viwango vya Ulemavu vinavyotumika kulipa fidia.

Aidha Meneja Tathmini na Usalama mahali pa Kazi WCF, Bi. Naanjela Msangi amesema katika  kukuza mbinu za kuzuia ajali, magonjwa ama vifo vinavyotokana na kazi wanatoa Elimu kwa nadharia lakini pia kuna vifaa mbalimbali vya kujihami dhidi ya majanga kazini.

“Tunaonyesha vifaa sahihi vya kujihami kama vile mask (N95) kuzuia vumbi (normal dust), mask za kuzuia vumbi lenye kemikali, full face, Kifaa cha kupima viwango vya kelele maeneo ya kazi, kupima viwango vya mitetemo mwili mzima na mikono, kifaa cha kukinga kelele (ear muff), safety boots, reflectors na overall, hand gloves." alifafanua.

Kilele cha Maadhimisho ya siku ya Kimataifa ya Usalama na Afya mahali pa kazi hufanyika Aprili 28 kila mwaka ambapo Tanzania huungana na mataifa mengine duniani kuiadhimisha siku hii, lengo kubwa ni kuendeleza kampeni za kuhamasisha uwepo wa mazingira salama na yenye kulinda afya za watu katika sehemu za kazi ambapo kauli mbiu ya maadhimisho kwa mwakam huu ni “Mazingira salama na afya ni kanuni na haki ya msingi mahali pa kazi.”.

MNUFAIKA wa Mfuko wa Fidia kwa Wafanyakazi (WCF) Bw. Deus Anthony, viwanja vya Tumbaku mjini Morogoro Aprili 27, 2023

Mkurugenzi wa Huduma za Tathmini WCF, Dkt. Abdulsalaam Omar akisalimiana na Mnufaika wa WCF Bw. Deus Anthony, Kkwenye banda la Mfuko huo viwanja vya Tumbaku mjini Morogoro Aprili 27, 2023

Mnufaika wa Mfuko wa Fidia kwa Wafanyakazi (WCF) Bw. Deus Anthony, akiwa amesimama mbele ya Bajaji yake viwanja vya Tumbaku mjini Morogoro Aprili 27, 2023

Meneja Tathmini na Usalama mahali pa Kazi WCF, Bi. Naanjela Msangi, akitoa elimu kuhusu kifaa cha kujihami na madhara yatokanayo na kazi

Afisa Tathmini vihatarishi mahali pa kazi Mwandamizi WCF, Bi. Susan R. Reuben akitoa elimu.

Afisa Mwandamizi wa Usalama na Afya Mahala pa Kazi (OSH), Bi. Tumaini Kyando (kushoto) akitoa elimu kuhusu OSH na shughuli za Mfuko kwa ujumla wake.

Afisa wa WCF, Bi. Neema Majaliwa (kushoto) amkimsikiliza mwananchi aliyefika banda la WCF ili kujifuzna masuala ya fidia.

Picha ya pamoja 

Mkurugenzi wa Huduma za Tathmini WCF, Dkt. Abdulsalaam Omar (kushoto) akitumia mchoro kumuelimisha Mwenyekiti wa TAMICO Mgodi wa Dhahabu Geita (GGM), Bw. Julius Stephen alipotembelea banda la WCF Aprili 27, 2023.