Na Christopher Lissa, UPL
Wadau wa usafi wa mazingira wametakiwa kujitokeza kushiriki usafishaji wa fukwe wilayani Temeke baada ya fukwe hizo kutokusafishwa kwa kipindi kirefu.
Mwito huo umetolewa na Mratibu wa Kampeni ya Safisha Pendesha Dar es Salaam, wilayani Temeke, Asya Mbarouk, alipokuwa akizungumza na mwandishi wa habari hili, Dar es Salaam, kuhusu kampeni ya Kurasini Beach Clean Up, inayotarajiwa kufanyika Novemba 19 mwaka huu.
Asya, alisema kampeniF hiyo imeandaliwa na Taasisi ya Tanzania Cleanup and Conservation Initiative (TCCI) kwa kushirikiana na Wadau wa Usafi wa Mazingira Temeke (WAUMATE).
“Mgeni Rasmi atakuwa ni Naibu Meya wa Halmashauri ya Manispaa ya Temeke, Arnaold Peter. Usafi utafanyika katika Kijiji cha Wavuvi Kurasini. Wadau tunaomba wajitokeze kushiriki,”alisema Asya.
Asya alisema, huo ni mwendelezo wa Kampeni ya Safisha, Pendesha Dar es Salaam, iliyoasisiwa na Mkuu wa Mkoa wa Dar es Salaam, Amos Makalla.
Awali Mkurugenzi Mtendaji wa Taasisi ya TCCI, Kingungo Salum, alisema itakuwa ni mara ya kwanza kwa kampeni kubwa ya usafi kufanyika katika fukwe za Wilaya ya Temeke kupitia taasisi za mazingira,wadau na wananchi.
Alisema kampeni hiyo ya kusafisha fukwe itakuwa endelevu kwa fukwe zote wilayani humo.
“Napenda kuwasisitiza wadau na taasisi zingine kushiriki ili kuifanya Temeke yetu iwe safi na salama. Pia watu binafsi na vikundi waje kushirikiana na WAUMATE kufanya usafi huo,”alieleza Salum.
Baadhi ya wadau wa usafi wilayani humo, wamepongeza hatua hiyo ili fukwe hizo ziwe kivutio na mahali salama kwa wananchi kupumzika au kufanya shughuli zao.
Hivi karibuni Idara ya Mazingira wilayani Temeke, ilifanya kampeni kubwa ya usafi katika eneo la Mbagala Rangi Tatu, katika Kata ya Kibonde Maji, iliyoongozwa na Mkuu wa Wilaya hiyo, Jokate Mwegelo na Meya wa Manispaa hiyo, Abdallah Mtinika.
Mkuu wa Mkoa wa Dar es Salaam, Makalla alielekeza kila ifikapo Jumamosi ya mwisho wa mwezi kuwa siku ya usafi, mkoani humo.
No comments:
Post a Comment
MAONI (COMMENTS)👇