MTEMVU AWAONYA WANAOTAKA MPASUKO NDANI YA CHAMA, ATAKA RAIS SAMIA KUUNGWA MKONO, CCM ING'ARE UCHAGUZI WA 2024/25

Na Heri Shaaban, Ilala
Mwenyekiti wa Chama Cha Mapinduzi (CCM) mkoa Dar es Salaam Abas Mtemvu, amewataka wana CCM mkoa huo kushirikiana na kujenga Umoja ndani ya Chama na kuonya kuwa wasipofanya watasababisha mpasuko ambao utakigharimu chama itagharimu wakati wa Uchaguzi mwaka 2024 na 2025.

Mtemvu amesema, ili kuhakikisha CCM inakuwa salama na kupata ushindi wa kishindo katika Uchaguzi huo, atashirikiana na viongozi wenzake kukabiliana na yeyote ambaye ataonyesha dalili za kutaka kuchafua hali ya hewa na kuonya kuwa hakuna atakayeonewa haya wala kuvumiliwa.

Mwenyekiti Mtemvu aliyasema hayo wakati akizungumza katika hafla ya Diwani wa Kata ya Kivukoni Sharik Choughule akiwasilisha Taarifa ya Utekekezaji wa Ilani ya Chama Cha Mapinduzi, hafla ambayo ilifanyika jana, katika Ukumbi wa Karimjee jijini Dar es Salaam.

"Nawashukuru wana CCM wote hawa wajumbe wa Mkutano Mkuu wa CCM mkoa huu wa Dar es Salaam kwa kuonyesha ushirikiano na kuniamini na kunipa kura za kishindo, sasa kazi iliyopo mbele yetu ni kumuunga mkono Mwenyekiti wetu Rais Samia kuhakikisha anatekeleza azima yake ya kuliongoza taifa na Chama vizuri.

Ninaamini tukiwa wamoja tutafanikiwa kufanya vizuri wakati wa Uchaguzi wa Mwaka 2024 Serikali za Mitaa na Uchaguzi Mkuu wa Rais, Wabunge na Madiwani mwaka 2025, lakini tukithubutu kuparaganyika na kuzusha mpasuko hatutafanya vizuri katika chaguzi hizo." alisema Mtemvu.

Kuhusu Uteuzi wa Uchaguzi mdogo wa Kata ya Majohe Wilayani Ilala Mwenyekiti Mtemvu alisema Waliopendekezwa  wamepitisha wote, na kusisitiza kwamba hakuna mgombea yeyote atakaye katwa jina mkoa Dar es Salaam katika chaguzi zote na kwamba wataheshimu mapendekezo ya vikao vya uchujaji.

Alimpongeza Diwani Choughule kwa Utekelezaji wa Ilani ya CCM ya mwaka 2021/ 2022  na kuwataka Madiwani wengine kuiga mfano huo,  waandae Utekelezaji wa Ilani na wakimualika atafika katika Uwasilishaji  wa Ilani na kukagua Miradi kila Kata .

Akizungumzia ukosefu wa Ofisi ya  Afisa Mtendaji wa Kata ya Kivukoni Mtemvu alisema atazungumza na Naibu Spika wa Jamhuri ya  Muungano wa Tanzania  Mbunge wa Jimbo la Ilala Mussa Zungu, ambaye atamtumia usiku na mchana katika Utekelezaji wa Ilani kuakikisha Ofisi inapatikana Kivukoni .

Mwenyekiti wa CCM mkoa wa Dar es Salaam Abbas Mtemvu akipokea nakala ya Utekelezaji wa Ilani ya CCM kutoka kwa Diwani wa Kata ya Kivkoni Sharik Choughule, katika hafla iliyofanyika Ukumbi wa Karimjee jijini Dar es Salaam, jana.