RAIS SAMIA AENDELEA KUUPIGA MWINGI, APANDISHA POSHO ZA SAFARI ZA NDANI YA NCHI NA MALIPO YA KAZI MAALUM KWA WATUMISHI WA UMMA

Na James Mwanamyoto, Dodoma
Tarehe 27 Mei, 2022

Rais wa Jamhuri ya Muungano wa Tanzania Mhe. Samia Suluhu Hassan ameendelea kuupiga mwingi kwa kutoa kibali cha kurekebisha posho ya kujikimu ya safari za ndani ya nchi kwa Watumishi wa Umma na kiwango cha malipo ya kazi maalum (Extra Duty) kwa Watumishi wa Umma nchini ambapo utekelezaji wake unaanza rasmi tarehe 01 Julai, 2022.

Hayo yamesemwa na Katibu Mkuu, Ofisi ya Rais, Menejimenti ya Utumishi wa Umma, Dkt. Laurean Ndumbaro jijini Dodoma wakati wa Kikao Kazi cha Wakuu wa Idara na Vitengo vya Utawala na Usimamizi wa Rasilimaliwatu katika Utumishi wa Umma chenye lengo la kutathmini utendaji kazi na kuboresha utoaji wa huduma kwa wananchi.

Dkt. Ndumbaro amesema kutokana na kibali hicho cha Mhe. Rais, posho ya kujikimu ya safari za ndani ya nchi kwa Watumishi wa Umma kwa kiwango cha juu imepanda kutoka shilingi 120,000/= hadi 250,000/= na kiwango cha chini kutoka shilingi 80,000 hadi 100,000/=.

Ameongeza kuwa, kiwango cha malipo ya kazi maalum (Extra Duty) kwa Watumishi wa Umma kimeongezeka kwa ngazi zote, ambapo kwa ngazi ya chini kimepanda kutoka shilingi 15,000/= hadi 30,000/=, kwa ngazi ya kati kimeongezeka kutoka shilingi 20,000/= hadi 40,000/= na kwa ngazi ya juu kimeongezeka kutoka shilingi 30,000 hadi 60,000/=.

Dkt. Ndumbaro amesisitiza kuwa, viwango hivyo vipya vitalipwa na Serikali kupitia bajeti iliyoidhinishwa na Bunge la Jamhuri ya Muungano wa Tanzania kwa Mwaka wa Fedha 2022/2023, hivyo taasisi zisiombe nyongeza ya bajeti ili kuwalipa viwango hivyo watumishi wake.

Kufuatia ongezeko hilo, Dkt. Ndumbaro ametoa wito kwa Watumishi wa Umma wote nchini kufanya kazi kwa bidii, maarifa, weledi na nidhamu ya hali ya juu ili kuunga mkono kwa vitendo jitihada za Mhe. Rais za kuboresha masilahi wa Watumishi wa Umma.
“Watumishi wa Umma tuwajibike kwa hiari bila kushurutishwa, tuwe wabunifu zaidi ili kutoa mchango katika maendeleo ya taifa na ustawi wa nchi kwa ujumla ikiwa ni pamoja na kuhakikisha tunatatua kero zinazowakabili wananchi,” Dkt. Ndumbaro amesisitiza.

Sanjari na hilo, Dkt. Ndumbaro ametoa wito kwa Wakuu wa Utumishi wa Umma hususani walio katika halmashauri na taasisi zenye matawi kuwatembelea watumishi wanaowasimamia kwenye maeneo yao ya kazi ili waweze kubaini changamoto zinazowakabili na kuzitatua ili kuondoa changamoto ya watumishi kusafiri umbali mrefu kwenda makao makuu kwa lengo la kuzitafutia ufumbuzi changamoto zao.

“Mkiwafuata katika vituo vyao vya kazi mtawasaidia kuwapunguzia gharama za kusafiri kwenda makao makuu ya wilaya, mkoa au makao makuu ya nchi kwa ajili ya kutatua changamoto zao kwani nyie viongozi mkiwatembelea Serikali ndio itawagharamia,” Dkt. Ndumbaro amefafanua.

Rais wa Jamhuri ya Muungano wa Tanzania Mhe. Samia Suluhu Hassan tangu aingie madarakani amekuwa mstari wa mbele kuboresha stahiki za Watumishi wa Umma nchini ili kuwajengea ari na morali ya kutoa huduma bora kwa wananchi na hatimaye wananchi wajivunie uwepo wa Serikali yao.

Rais Samia Suluhu Hassan

Katibu Mkuu Ofisi ya Rais Menejimenti ya Utumishi wa Umma Dk. Laurean Ndumbaro akizungumzia uamuzi wa Rais wa Jamhuri ya Muungano wa Tanzania Samia Suluhu Hassan wa kutoa kibali cha kurekebisha posho ya kujikimu ya safari za ndani ya nchi na kiwango cha malipo ya kazi maalum (Extra Duty) kwa Watumishi wa Umma nchini, Jijini Dodoma, leo