MBUNGE WA VITI MAALUM CCM MKOA WA RUKWA AFARIKI DUNIA, NI IRENE NDYAMKAMA

CCM Blog, Dodoma
Mbunge wa Viti Maalum Mkoa wa Rukwa (CCM) Irene Alex Ndyamkama, amefariki Dunia leo, Aprili 22, 2022 katika Hospitali ya Tumbi, Kibaha mkoa wa Pwani alipokuwa akipatiwa matibabu.

"Spika Dk. Tulia Ackson anasikitika kutangaza kifo cha Mhe. Irene Alex Ndyamkama Mbunge wa Viti Maalum Mkoa wa Rukwa (CCM) kilichotokea leo tarehe  24 Aprili, 2022 katika Hospitali ya Tumbi, Kibaha alipokuwa akipatiwa matibabu.

Nimepokea kwa masikitiko makubwa taarifa za kifo cha Mhe. Irene Alex Ndyamkama.  Natoa pole kwa familia ya Marehemu, ndugu, jamaa, Waheshimiwa Wabunge na Wananchi wa Mkoa wa Rukwa. Mwenyezi Mungu awape moyo wa uvumilivu na subira katika kipindi hiki kigumu,” amesema Spika Tulia Ackson akitangaza kifo cha Mbunge huyo.

Taarifa iliyotolewa  na Kitengo cha Mawasiliano na Uhusiano wa Kimataifa, Ofisi ya Bunge, jijini Dodoma, imesema, Ofisi ya Bunge kwa kushirikiana na familia ya Marehemu inaratibu mipango ya mazishi na taarifa zaidi zitaendelea kutolewa.

Irene Alex Ndyamkama, enzi za uhai wake.

Blog ya Taifa ya CCM(CCM Blog), inatoa pole za dhati, kwa Ndugu, Jamaa, Marafiki, Wabunge na Spika wa Bunge kwa msiba huo. Bashir Nkoromo, Msimamizi Mkuu wa CCM Blog.