AG FELESHI ASHIRIKI MAFUNZO YA KUWAJENGEA UWEZO VIONGOZI WA BUNGE

Na Maalum, Ofisi ya AG
Bunge la Jamhuri ya Muungano wa  Tanzania limeanda  mafunzo  maalumu ya siku tano ya kuwajengea  uwezo   Wajumbe wa Kamati ya Uongozi, Makamu Wenyeviti wa Kamati,  na Wajumbe wa Tume ya Utumishi wa Bunge, ambayo yameanza jana, katika Ofisi  Ndogo ya Bunge Mjini Zanzibari.

Katika mafunzo hayo ambayo Mgeni rasmi alikuwa ni Spika wa Bunge la Jamhuri ya Muungano wa Tanzania, Dk.  Tulia Aksoni, Mwanasheria Mkuu wa Serikali Jaji Dk. Eliezer Feleshi ( Mb) ni  miongoni mwa viongozi  wanaoshiriki   mafunzo  hayo akiwa ni Mjumbe wa Kamati ya Uongozi ya Bunge.

Katika siku ya kwanza  ya mafunzo hayo,  mada iliyowasilishwa kwa washiriki  ilihusu madaraka, majukumu, mipaka ya utendaji kazi, uzoefu na changamoto na uendeshaji wa Tume ya Utumishi wa Bunge na Kamati ya Uongozi.

Mada  hiyo iliwasilishwa na Spika Mstaafu wa Bunge la Jamburi ya Muungano wa Tanzania Anne Makinda, huku  wadadisi wa mada wakiwa ni Spika Mstaafu wa  Baraza la Wawakilishi  Pandu Amir Kificho na Spika Mstaafu wa Bunge la Jamhuri ya Muungano wa Tanzania Pius Msekwa.

Aidha  mada nyingine iliyowasilishwa katika siku ya kwanza  ni pamoja na Bima ya Maisha iliyowasilishwa na  Shirika la Bima la Taifa ( NIC).

Kwa mujibu  wa ratiba ya mafunzo hayo, leo Jumanne, Washiriki  hao wataelimishwa na kujengewa uwezo kuhusu; uzoefu, changaoto na mbinu za uendeshaji bora wa vikao vya Bunge la Vyama Vingi vya Siasa.

Mada hiyo itawasilishwa na Spika  Mstaafu wa Bunge la Jamhuri ya Muungano wa Tanzania Pius Msekwa, huku wadadisi wa mada hiyo wakiwa ni Spika Mstaafu  wa Bunge la Jamhuri ya Muungano wa Tanzania Anne Makinda na  Spika Mstaafu wa    Baraza la  Wawakilishi Zanzibar  Pandu Kificho.

Aidha mada nyingine itakayowasilishwa na kujadiliwa  wakati  Mafunzo hayo ni juu ya  Uratibu wa shughuli za Bunge na Serikali; uzoefu na  changamoto.

Mada hii itawasilishwa na  Mhe. Jenista Mhagama (Mb) Waziri wa Nchi  Ofisi ya Rais ( Menejimenti ya Utumishi wa Umma na Utawala Bora).

 Washiriki wa Mafunzo hayo pia watajengewa uwezo kuhusu misingi ya uongozi na  utawala bora, mada itakayotolewa na   Mtaalamu kutoka Uongozi  Institute.

Viongozi hao wa Bunge  pia  watajengewa uwezo  kuhusu masuala ya  Diplomasia, Itifaki, Miiko na masuala muhimu yanayojenga Haiba ya  Viongozi. Mada hii itawasilishwa  na Mtaalamu kutoka Chuo cha Diplomasia.

Vilevile  Viongozi hao  wataelimishwa kuhusu huduma za Bima ya Afya kwa wabunge, uzoefu, mafanikio na changamoto itakakowasilishwa na  Mtaalamu kutoka Mfuko wa Taifa ya Bima ya Afya ( NHIF).

Mada nyingine itakayotolewa  itahusu Dhima ya mgawanyo wa madaraka na namna ya  kudhibiti muingiliano wa madaraka ya Mihimili ya Dola. Mada hii itawasilishwa na Mhe, Jumanne Sagini ( Mb), Naibu Waziri wa Mambo ya Ndani.  Mafunzo haya yanatarajiwa kuhitimishwa  Februari 25/2022.

Mwanasheria Mkuu wa Serikali,  Mhe, Jaji Dkt. Eliezer Feleshi ( Mb) akiwa katika picha ya  pamoja na  viongozi wanaoshiriki mafunzo ya siku tano  ya kuwajengea uwezo Kamati ya Uongozi wa  Bunge ambayo Mwanasheria Mkuu wa Serikali ni Mjumbe, Makamu Wenyeviti wa Kamati na Tume ya Utumishi  wa Bunge. Mafunzo hayo ya siku tano yaliyoanza jana, yanafanyika katika Ofisi  Ndogo ya Bunge  Zanzibar.

 
Imetolewa na Kitengo cha Mawasiliano, Ofisi ya Mwanasheria Mkuu wa Serikali