FAMASI ZINAZOWEKA MATANGAZO YA KUSIFIA UTOAJI HUDUMA KUFUNGIWA

MSAJILI wa Baraza la Famasi Nchini,Elizabeth Shekalaghe  akionesha mbele ya wanahabari alama inayotakiwa kuwekwa katika kila duka la dawa lenye leseni ya kufanya biashara hiyo ili iwe rahisi kwa jamii kuyatambua.

MSAJILI wa Baraza la Famasi Nchini,Elizabeth Shekalaghe  akifafanua jambo wakati wa mkutano na waandishi wa habari jijini Dodoma Desemba 10,2021.

PICHA ZOTE NA RICHARD MWAIKENDA

MSAJILI wa Baraza la Famasi Nchini,Elizabeth Shekalaghe  ametoa onyo kwa  Wamiliki  wa Maduka ya Dawa  za binadamu  kuweka matangazo ya huduma katika milango ya maduka yao kwani ni kinyume na Sheria ya  Baraza hilo huku akidai  watakaobainika watafungiwa  kutoa huduma.

Vilevile, ametoa wito kwa wanachi kuacha tabia ya kununua dawa kiholela kwani ni sumu na huleta madhara pale mtu anapotumia bila kufuata ushauri wa wataalamu.

Akizungumza na Waandishi wa Habari leo Ijumaa  Desemba 10,2021,kuhusu matumizi holela ya dawa,Msajili huyo  ametoa onyo kwa wamiliki hao kutoweka matangazo ya huduma katika milango ya maduka yao kwani ni kinyume na Sheria ya  Baraza hilo.

“Kumekuwa na utaratibu watu kuweka mabango kwenye milango kana kwamba wanatoa matibabu au anaweka picha ya daktari kwamba tunatoa  ushairi kana kwamba kuna huduma zinapatikana

“Niwaombe wamiliki wa maduka ya madawa kuacha mara moja na ndugu zangu nitakapopita na kukuta unatangaza, sheria tunapashwa kukufungia huduma,”amesema.

Aidha, amewataka  Wafamasia ambao hawajahuisha  leseni zao kufanya hivyo kabla ya Disemba 31 Mwaka huu kupitia mfumo wa kielektroniki.

“Sheria inawataka wanataaluma wote kufanya marejeo ya leseni zetu kwa mwaka sasa hivi tupo katika hatua nzuri kwani kati ya wafamasia 2597 ambao wamesajiliwa 2479 wamehuisha leseni zao sawa na aasilimia 93,”amesema.

Vilevile, ametoa wito kwa wanachi kuwa dawa ni sumuna huleta madhara pale mtu anapotumia bila kufuata ushauri wa wataalam wa afya hivyo waache tabia ya kununua dawa kiholela.

“Ni vema wananchi  mkafahamu kuwa zipo athari za matumizi yasiyo sahihi  ya dawa na athari zake ni kuongezeka kwa ugonjwa,kutokupata nafuu,kutokupona na hatimaye kupolekea kifo,”amesema.

Amewataka wananchi kuepuka kununua dawa kwenye maduka ambayo hayajasajiliwa  na Baraza la Famasi kwani ubora wake ni wa mashaka  na maelezo juu ya dawa hizo yanaweza kupotoshwa.

Pia  amewataka  wafamasia,mafundi sanifu wa dawa na wasimamizi kuzingatia sheria.

“Wafamasia wenzangu tuhakikishe tunasimamia  misingi ya utoaji huduma kwenye  taaluma hii ambayo tumeisomea,”amesema.