TTCL WAJITIA KITANZI MBELE YA WAZIRI NDUGULILE UBORESHAJI HUDUMA KWA WATEJA

Mkurugenzi Mtendaji wa Shirika la Mawasiliano Tanzania (TTCL), Waziri Kindamba akitangaza maazimio ya kikao kazi cha menejimenti ya shirika hilo kabla ya Waziri wa Mawasiliano na Teknolojia ya Habari, Dk. Faustine Ndugulile kukifunga juzi jijini Dodoma.  Kutoka Kulia ni Naibu Katibu Mkuu wa WIzara hiyo,Dk. Zainab  Chaula.PICHA NA RICHARD MWAIKENDA

Waziri wa Mawasiliano na Teknolojia ya Habari, Dk. Faustine Ndugulile akizungumza wakati wa kufunga kikao kazi cha menejimenti ya TTCL mjini Dodoma. Kutoka kushoto ni  Mkurugenzi Mtendaji wa Shirika la Mawasiliano Tanzania (TTCL), Waziri Kindamba na Katibu Mkuu wa wizara hiyo, Dk Zainab Chaula.

Baadhi ya mameneja wa TTCL mikoa mbalimbali wakiwa katika kikao hicho wakimsikiliza kwa makini Waziri Ndugulile alipokuwa akikifunga.

 

Na Richard Mwaikenda, Dodoma

SHIRIKA la Mawasiliano Tanzania (TTCL), limejitia kitanzi cha uboreshaji wa shirika hilo kwa kutangaza maazimio matano mbele ya Waziri wa Mawasiliano na Teknolojia ya Habari, Dk. Faustine Ndugulile watakayoyatekeleza ndani ya mwaka mmoja.

 

Maazimio hayo yametangazwa mbele ya waziri jijini Dodoma Januari 17, 2021, na Mkurugenzi Mtendaji wa shirika hilo, Waziri Kindamba wakati wa kufunga kikao kazi cha siku tatu cha menejimenti kilichohudhuriwa na mameneja wa TTCL nchi nzima.

 

Kindamba ametaja maazimio hayo kuwa ni;Utekelezaji wa Ilani ya chama tawala cha CCM, kuongeza wateja kutoka asilimia mbili ya sasa hadi asilimia 6 na zaidi ndani ya mwaka mmoja,

watapanua wigo wa mawakala wa vocha na T Pesa kutoka 2800 hadi 3080 ndani ya miezi mitatu, lakini vilevile wataboresha kitengo cha huduma kwa wateja hadi ifikapo Machi mwaka huu.

 

Maazimio mengine aliyoyataja ni; uboreshaji wa Kitengo cha Biashara na Matangazo pamoja na kuimarisha uhusiano na taasisi binafsi za serikali kwa ujumla.

 

Waziri Dk. Ndugulile aliyapokea maazimio hayo kwa moyo mmoja na faraja na kuwaeleza kwamba kwa vile wameazimia wenyewe kufanya hivyo hana shaka kwamba yatatekelezwa kwa ufasaha ndani ya muda uliopangwa.

 

Amesema atafanya ziara nchi nzima kupima matokeo ya utekelezaji wa maazimio hayo na endapo yatakwenda kinyume, basi yupo tayari kumshughulikia Mkurugenzi Mtendaji ili nay eye kabla ya kuwajibishwa awashughulikie watendaji walio chini yake.

 

“Niliwaeleza kwamba mimi nitaingia mkataba wa uwajibikaji na wakurugenzi watendaji, usipotimiza malengo mliyojiwekea nitakushughulikia, sasa na wewe kaingie mikataba na mameneja wako ili kabla ya kushughulikiwa uwashughulikie wao,”amesisitiza Dk. Ndugulile.

 

Lakini vilevile ili uboreshaji huo uende kwa ufanisi Dk. Ndugulile ameahidi kuzitafutia  ufumbuzi baadhi changamoto alizoambiwa  ikiwemo uhaba wa magari na vitendea kazi vingine muhimu.

 

Ameitaka TTCL kuandaa mpango mkakati wenye mambo muhimu na bajeti yake na kueleza  fedha watakazopewa  watazifanyia nini, zitaleta tija gani na kwa muda gani.

IMEANDALIWA NA RICHARD MWAIKENDA MHARIRI BLOG YA TAIFA YA CCM 0754264203