MBUNGE MWAKANG'ATA ATOA MISAADA YA SARUJI 200, MADAWATI 50 KWA SHULE SUMBAWANGA

Mbunge wa Viti Maalumu Mkoa wa Rukwa, Bupe Mwakang'ata (kulia), akikabidhi Afisa Elimu Sekondari wa Manispaa ya Sumbawanga, George Nyanga msaada wa mifuko 200 ya saruji kwa ajili ya kugawa kwa shule zilizofanya vizuri katika manispaa hiyo. Kushoto ni Afisa Elimu Msaidizi wa Manispaa ya Sumawanga, Graseana Killenga.

Mbunge Mwakang'ata akizungumza baada ya kukabidhi misaada hiyo.

Mbunge Mwakang'ata akikabidhi vyeti na zawadi zinginezo kwa walimu ambao shule zao zimefanya vizuri katika mitihani.

MBUNGE wa Viti Maalumu Mkoa wa Rukwa, Bupe Mwakang’ata ametoa misaada mbalimbali ya saruji pamoja na madawati mkoani humo.

Mwakang’ata ametoa mifuko 200 ya saruji yenye thamani ya sh. Milioni 12 kwa shule 10 za msingi zilizofanya vizuri katika mitihani ya darasa la saba na shule 10 zenye mahitaji maalumu katika manispaa ya Sumbawanga.Kila shule inapata mifuko 10.

Shule zilizonufaika ni; Mwenge A, Kantalama Mazoezi, Mapinduzi, Chemchem, Lukewile, Utengule, Kiwelu, Mwenge B, Kizwite na Molo.

Katika hafla hiyo iliyofanyika hivi karibuni mjini Sumbawanga, mbunge huyo alitoa pia zawadi ya vyeti, katoni za sukari na zawadi zinginezo kwa walimu ambao shule zilifanya vizuri.

Akizungumza wakati wa kukabidhi zawadi hizo, Mbunge Mwakang’ata, alisema ameamua kufanya hivyo ikiwa ni shukrani kwa wananchi waliomwezesha kushika wadhifa huo, lakini pia kuunga mkono juhudi za Rais wa Jamhuri ya Muungano wa Tanzania, John Magufuli kuhusu elimu bure ambayo imefanya wanafunzi wengi kupata elimu.

Madawati 50 yenye thamani ya sh. Milioni 3.5 yalikabidhiwa kwa Shule ya Msingi Manzitiswe iliyopo Manispaa ya Sumbawanga.

Akipokea madawati hayo Mwalimu Mkuu wa Shule hiyo, Lasko Manase alisema yeye na wajumbe wa kamati ya shule, wameupokea msaada huo kwa furaha kubwa kwani umepunguza kwa kiasi kikubwa upungufu wa madawati shuleni hapo.

Manase alisema kuwa kabla ya ujio wa madawati hayo, shule hiyo ilikuwa na upungufu wa madawati 185, hivyo kwa sasa baada ya kupatikana madawati hayo 50, upungufu utakuwa madawati 135. Madawati hayo yamegawanywa kwenye vyumba viwili vya madarasa.

Mwalimu Manase amewaomba wadau wengine akiwemo mbunge wa Sumbawanga Mjini, Aishi Hillary na wabunge wengine kuunga mkono juhudi za Mwakang’ata kwa kutoa msaada wa mabawati yaliyobakia.

Naye Afisa Elimu Msaidizi wa Manispaa ya Sumbawanga, Graseana Killenga alimshukuru sana Munge Mwakang’ata kuwapatia msaada huo na kuulinganisha kama lulu na kwamba saruji hiyo itasaidia sana kupunguza uhaba wa matundu ya vyoo na kusaidia ujenzi wa baadhi ya vyumba vya madarasa katika shule hizo kumi.

Ndugu mdau ukitaka kujua zaidi yaliyojiri katika hafla hiyo basi nakuomba uendelee kusikiliza clip hii ya video...

IMEANDALIWA NA;