VIONGOZI WANAODIDIMIZA MICHEZO NCHINI WAJIONDOE AMA WAONDOLEWE-SINGO

Mkurugenzi  wa Michezo wa Wizara ya Habari, Utamaduni, Sanaa na Michezo, Yusuf Singo akizungumza wakati wa ufunguzi wa Mkutano Mkuu wa Uchaguzi wa Kamati ya Olimpiki Tanzania jijini Dodoma.

 Na Richard Mwaikenda, Dodoma

MKURUGENZI  wa Michezo wa Wizara ya Habari, Utamaduni, Sanaa na Michezo, Yusuf Singo, amewataka viongozi wa vyama vya michezo nchini wanaokiuka katiba zao na kudidimiza michezo wajiondoe wenyewe ama waondolewe.

 

Singo ameyasema hayo alipokaribishwa kuzungumza wakati wa ufunguzi wa Mkutano Mkuu wa Uchaguzi wa Kamati ya Olimpiki Tanzania (TOC), Dodoma Hoteli jijini Dodoma  leo Desemba 12, 2020.

 

Amesema wapo viongozi wa vyama wanaofanya kwa makusudi kuzikiuka katika zao kwa kutofanya chaguzi na kutoendeleza michezo, hivyo wanatakiwa kujiondoa ama kuondolewa ili wapatikane viongozi wenye moyo na uwezo wa kuendeleza michezo nchini.

 

Singo, amesema kauli aliyoitoa Rauis wa Tanzania, Dk. John Magufuli wakati anawaapisha  mawaziri na manaibu waziri Ikulu ya Chamwino, kuwa hapendi tena kusikia timu za Taifa kufungwa fungwa magoli 10, hakumaanisha kwa mchezo wa soka tu, bali michezo yote nchini.

 

Alisema wajue kwamba vyeo walivyo navyo si vya kwao bali wanawawakilisha wananchi, hivyo kinachotakiwa kwao kufanya kazi kwa bidi kuhakikisha  wanaiendeleza michezo ili timu za Taifa ziwe zinapata ushindi na kuwafurahisha Watanzania.

 

Singo, amesema wiki ijayo wameandaa  Kongamano la wadau wa michezo wakaojadili namna ya kuinua hadhi ya michezo nchini. Mgeni rasmi katika Kongamano hilo anatarajiwa kuwa Waziri wa Habari, Utamaduni Sanaa na Michezo, Innocent Bashungwa.