RC MAKONDA:NI BURUDANI KWA KWENDA MBELE, USHINDI WA CCM 90% UCHAGUZI MKUU 2020

Mkuu wa Mkoa wa Dar es Salaam, Paul Makonda akikagua ujenzi wa jengo jipya la kisasa la CCM Wilaya ya Kindoni,  hivi karibuni.

 

Kikundi cha hamasa  kikitumbuiza wakati wa hafla ya kuweka jiwe la msingi ujenzi wa jengo la kisasa la CCM Wilaya ya Kinondoni.

Na Richard Mwaikenda.

MKUU wa Mkoa wa Dar es Salaam, Paul Makonda amejinasibu kwamba mwaka 2020 ni burudani kwa kwenda mbele kwa Chama Cha Mapinduzi (CCM), kwani ana uhakika itashinda kwa zaidi ya asilimia 90 katika uchaguzi mkuu.

Amesema chama hicho kitashinda udiwani, ubunge na Rais, hivyo yeye katika mkoa wake ameagiza kila wilaya kuandaa mashindano ya vikundi mbalimbali vya sanaa ili kupata vilivyo bora vitakavyotoa burudani wakati wa kushangilia ushindi huo.

Makonda , aliyasema hayo wakati wa hafla ya kuweka jiwe la msingi ujenzi wa jengo la kisasa la ghorofa moja la CCM Wilaya ya Kinondoni, Dar es Salaam.

Makonda ambaye pia ni Mwenyekiti wa Kamati ya Siasa, Ulinzi na Usalama ya mkoa huo, amemuagiza  Katibu wa Siasa na Uenezi wa Mkoa wa Dar es Salaam, Simon Mwakifwamba, kuandaa mashindano hayo.

RC Makonda ambaye alisema kwamba yeye ni zao lachama hicho na kwa mara ya kwanza aliteuliwa kuwa Mkuu wa Wilaya ya Kinondoni akiwa Umoja wa Vijana Makao Makuu,aliahidi kutoa zawadi kwa washindi wa kila wilaya sh. Mil. 10 na baadaye mshindi wa mkoa huo wenye wilaya tano ambazo ni; Kinondoni, Ilala, Temeke, Ubungo na Kigamboni.

“Najua Mwakifwamba kitaaluma ni msanii, hivyo naamini kazi ya kuandaa mashindano hayo itakuwa ni rahisi sana kwako. Nakuomba uandae vikundi vya sanaa vya wana CCM kila wilaya na vitakavyoshinda nitavizawadia sh. Mil 10,” alisema Makonda huku akishangiliwa na wanaCCM waliofurika katika hafla hiyo.

Alisema kuwa zawadi hizo zitatumika kuanzishia miradi kwa ajili ya vikundi vilivyoshinda ili wasanii wajiimarishe kiuchumi badala ya kuitumia hela hiyo vinginevyo.

Alitamba kuwa mwaka 2020 ni wa raha na burudani, hivyo watandaa tamasha kubwa la vikundi vya  CCM, kwa ajili ya kusherehekea ushindi huo mkubwa wa chama ambao dalili zake zimeanza mwaka huu kwa kukomba nafasi nyingi za viongozi wa serikali za vitongoji, vijiji na mitaa.

Aliwataka wanaCCM kutembea kifua mbele kwani dalili za ushindi 2020 ni wa dhahiri hasa kutokana na kazi kubwa ya kuliletea Taifa maendeleo iliyofanywa na Mwenyekiti wa CCM, Rais John Magufuli kwa kipindi cha miaka mine ya uongozi wake.