RC MAKONDA 'KUIPATIA' CHADEMA BURE JENGO LA CCM KINONDONI

 Na Richard Mwaikenda

MKUU wa Mkoa wa Dar es Salaam, Paul Makonda, amemtaka Mwenyekiti wa Chama cha Demokrasia na Maendeleo (Chadema), Freeman Mbowe aende kwake ‘ampatie’ bure Jengo la zamani la Chama Chama Cha Mapinduzi (CCM), Wilaya ya Kinondoni, ili wahamishie makao makuu ya chama chao. 

 Makonda ambaye pia ni Mwenyekiti wa Kamati ya Siasa na Usalama ya mkoa huo, alisema kuwa anawaonea huruma Chadema kuendelea kukaa kwenye nyumba ya kukodi ambayo alidai mara nyingine wanashindwa kulipia pango.

Ameyasema hayo wakati wa kuweka jiwe la msingi wa ujenzi wa jengo la kisasa la ghorofa moja la ofisi za CCM Wilaya ya Kinondoni litakalokuwa na hadhi ya kipekee. 

“Nauomba uongozi wa CCM Wilaya ya Kinondoni unikubalie ombi langu la kuwapatia Chadema jengo la zamani mara tu ujenzi wa jengo jipya utakapokamilika.

 Tutawaruhusu wabadilishe rangi na maandishi waweke majina ya chama chao” alitania Makonda huku akishangiliwa na wanaCCM waliohudhuria sherehe hiyo. 

Amesema kuwa anawaonea huruma kwa miaka 15, wanaendelea kupanga na inafikia wakati mwenye nyumba anakwenda kwake kumuomba aushinikize uongozi wa Chadema umlipe deni la pango analowadai, lakini yeye inamuwia vigumu kuchukua hatua hiyo kwa sababu za kisiasa. 

 Pia, amesema kuwa anampenda Mbowe kwani hata kwenye mtandao wa Twitter aliandika maneno ya kumtakia ushindi wa uenyekiti wakati wa mkutano wao mkuu wa uchaguzi. 

Amesema kuwa amemtakia ushindi Mbowe kwa vile anamjua vizuri kuwa ana udhaifu wa uongozi, hivyo ni bora achaguliwe yeye ili CCM iendelee kuwaghalaghaza. 

Makonda amejitolea kujenga ofisi za CCM za kisasa zenye hadhi katika wilaya tano za Mkoa wa Dar es Salaam ambazo ni; Kinondoni, Ubungo, Kigamboni, Temeke na Ilala. Gharama ya ujenzi wa majengo yote hayo ni zaidi ya sh. mil.2.

 Jengo la zamani la CCM Kinondoni ambalo RC Makonda amedai atawapatia Chadema walitumie kama makao makuu. Jengo hilo lipo eneo la Mkwajuni Dar.

 Mwenyekiti wa Kamati ya Siasa na Usalama ya Mkoa wa Dar es Salaam, ambaye pia ni Mkuu wa Mkoa wa Dar es Salaam, Paul Makonda akiweka Jiwe la Msingi ujenzi wa jengo jipya lenye ghorofa moja. Jengo hilo litakuwa na ukumbi wa mikutano, ofisi za viongozi, ukumbi mdogo wa vikao vya kawaida, jiko, vyoo na mambo mengine muhimu.

 Makonda akikagua maendeleo ya ujenzi wa jengo hilo linalotarajiwa kukamilika Machi mwaka ujao.

 Makonda akioneshwa ramani ya jengo hilo

 Kikundi cha Hamasa kikitumiza wakati wa hafla hiyo

 Katibu wa Siasa na Uenezi wa CCM Mkoa wa Dar es Salaam, Simon Mwakifwamba akihamasisha na kuwatambulisha viongozi wa  mkoa huo waliohudhuria hafla hiyo.

 Mwenyekiti wa CCM, Wilaya ya Kinondoni Harold Maruma akimshukuru RC Makonda kwa moyo wake wa kujitolea kujenga jengo hilo. Kulia ni Katibu wa CCM Mkoa wa Dar es Salaam, Zakaria Mwansasu.

Mwenyekiti wa CCM Mkoawa Dar es Salaam, Kate Kamba akitoa shukrani za dhati kwa RC Makonda na kuwataka wanachama wa CCM kujenga umoja na ushirikiano hasa katika kuwatumikia wananchi. Wa nne kulia ni Mkuu wa Wilaya ya Kinondoni, Godfrey Chongolo. PICHA ZOTE NA RICHARD MWAIKENDA