WAZIRI MKUU MGENI RASMI LEO UWANJA WA TAIFA

Waziri Mkuu, Kassim Majaliwa leo anatarajiwa kuwa mgeni rasmi kwenye hitimisho la kilele cha tamasha la wiki ya Simba, Simba Day kwenye Uwanja wa Taifa Dar es Salaam, imeelezwa.

Tamasha hilo ni la 10 tangu kuanza kufanyika kwake likiwa na lengo la kuweka hadharani majembe mapya yaliyosajiliwa na timu hiyo pamoja na nyuso mpya zitakazotumika msimu ujao wa Ligi Kuu na michuano ya kimataifa.

Mwekezaji wa klabu hiyo, Mohamed Dewji alisema Dar es Salaam jana kuwa Majaliwa ndiye atakuwa mgeni rasmi katika hafla hiyo ya hitimisho la wiki ya Simba, ambayo hufanyika kila mwaka. Simba katika mchezo huo itacheza dhidi ya Dynamo ya Zambia.

Mchezo huo wa kirafiki ni maalumu kwa kuwafurahisha mashabiki na wapenzi wa timu hiyo, utakuwa wa kwanza kuchezwa tangu mabingwa hao walipowasili kutokea nchini Afrika Kusini ambako waliweka kambi ya wiki mbili kujiandaa na msimu mpya.

Ndani ya wiki ya Simba Day msimu huu imeenda sambamba na shughuli mbalimbali za kijamii kama ilivyokuwa kawaida yao huko nyuma kwa kutembelea vituo vya afya na kutoa damu pamoja na misaada kadhaa kwa wagonjwa na watoto yatima.

Dewji aliyasema hayo jana wakati wa uwekaji wa jiwe la msingi la uwanja wa Simba uliopo Bunju nje kidogo ya jiji la Dar es Salaam, ambao unajulikana kama Simba Bunju Complex.

Waziri wa Habari, Utamaduni, Sanaa na Michezo, Dk Harrison Mwakyembe ndiye alikuwa mgeni rasmi katika uwekaji wa jiwe hilo la msingi la uwanja huo.