UBINGWA WA MBWANA SAMATTA WAIBUKA BUNGENI

Baada ya Kipindi cha maswali na majibu mbunge wa Viti Maalum, Amina Molel alisimama bungeni kuomba mwongozo akihoji ni kwanini Nahodha wa timu ya Taifa na Mshambuliaji wa timu ya KRC Genk ya Ubelgiji, Mbwana Samatta hapongezwi na Serikali licha ya sifa kubwa anazoziletea taifa.

Utakumbuka hivi karibuni Mbwana Samatta ambaye anaichezea timu yake ya KRC Genk walitangazwa rasmi kuwa Mabingwa wa ligi kuu ya Ubelgiji.

 “Kutokana na kazi nzuri aliyoifanya Mtanzania mwenzetu, tumeona huko nje wakishangilia kwa kutumia bendera ya Tanzania ni dhahiri kabisa ameitangaza vyema Nchi yetu, ninaomba kupata kauli ya Serikali kuhusiana na jambo hilo ili kutoa motisha kwa watanzania wengine” alihoji.

Baada ya kauli hiyo, Spika wa Bunge la Jamhuri wa Muungano wa Tanzania, Job Ndugai akijibu hoja hiyo amesema kuwa jambo hilo ni jema, Serikali imelipokea na italifanyia kazi.