MAGEREZA YAKANUSHA WAFUNGWA KULAWITIANA

Jeshi la Magereza nchini  limekanusha vikali taarifa iliyodai kwamba wafungwa wa kiume wanaingiliana kimwili katika Gereza Shinyanga na kusema kuwa taarifa hiyo siyo ya kweli.

Taarifa maalum toka ofisi ya kamishna Jenerali wa Magereza inasema kuwa habari hiyo ya upotoshwaji imechapishwa na gazeti la nipashe lenye namba ISSN 0856 NA. 0579874 la tarehe 25 Machi, 2019 katika ukurasa wake wa kwanza ikisomeka kwamba “MAGEREZA YAKIRI TATIZO WAFUNGWA KUINGILIANA”.

Pia, katika ukurasa wa pili (02) wa gazeti hilo, imeelezwa kuwa wafungwa wa kiume katika Gereza la Mkoa wa Shinyanga (Mhumbu), wamedaiwa kufanya ngono kinyume na maumbile, hali iliyoelezwa kuchangia maambukizi ya magonjwa ikiwemo virusi vya UKIMWI. 

"Ieleweke kuwa aliyenukuliwa kutoa taarifa hiyo, Ofisa wa Dawati la Jinsia la Magereza Mkoa wa Shinyanga, Victoria Kizito siyo Msemaji wa Jeshi la Magereza na hana mamlaka ya kutoa wala kudhibitisha habari wala taarifa kwa niaba ya Jeshi." Imesisitiza taarifa hiyo.

Imeeleza Sheria za nchi ikiwemo Sheria na kanuni za Jeshi la Magereza zinakataza vitendo vya aina hiyo kwa vile ni kosa la jinai.

"Vitendo hivyo vinadhibitiwa ndani ya magereza kwa kuwaelimisha wafungwa madhara yake na pindi kunapotokea jaribio la mfungwa kujihusisha na vitendo hivyo, Mhusika huchukuliwa hatua kali za kinidhamu kwa mujibu wa taratibu za Jeshi ikiwa ni pamoja na kufikishwa mahakamani kwa hatua za kisheria."

Mwisho Jeshi hilo limevikumbusha Vyombo vya habari na waandishi kuwa taarifa zinazolihusu Jeshi la Magereza hutolewa au kuthibitishwa na Kamishna Jenerali wa Magereza au Msemaji wa Jeshi, hivyo taarifa zozote zinazotolewa nje ya utaratibu huo zisipokelewe.